Yesu Wakuatewa

Yesu nu apostolo enji ayile mu baba dia Kidelona gu Mulundu wa Mitshi ya Olive. Yakhalele mukatshi dia phipha, mueta wakhalele wavula. Tangua ahetele mu dihia dia Getesemane, Yesu waawambelele egi: “Salenu haha, mubandjigo tulo.” Gungima wayile ndambo gualeha nu ene, wafugamele. Wakhalele nu gikenene giavula, wakombelele Yehowa egi: “Gutshigina guaye gukalegewe.” Yehowa watumile muanjelo ha gumuhana gikhesa. Tangua Yesu wavutugile fundo diakhalele apostolo, wasangele apostolo thathu mubanda. Wazuelele egi: ‘Zugenu! Didi dishigo tangua dia gubanda tulo! Tangua diatagana hagula nguhanewe ha mago a mbalagaji.’

Gungima, Yudasa wajile nu athu avula akhalele nu phogo jia khusa nu mitshi. Wakhalele mujiya muabonga fundo diakhalele Yesu, handaga akhalele muya n’enji mbala jiavula mu dihia diene. Yudasa wawambelele masuta egi ngudi gumidijiga Yesu. Wayile mbala imoshi gudi Yesu, wamuwambelele egi: ‘Moyo, Mulongeshi!’ Gungima wamuhanele beze. Yesu wazuelele egi: ‘Yudasa, wangudiga mu beze?’

Yesu wamaganele gutuama dia athu ene, waahudile egi: “Mudi mukamba nanyi?” Azuelele egi: “Yesu wa gu Nazaleta.” Yesu waavutudile egi: “Ame yowu,” mukut’awo agasue avutugile gungima, abuile mu mavu. Yesu waahuidile luko egi: “Mudi mukamba nanyi?” Azuelele luko egi: “Yesu wa gu Nazaleta.” Yesu waawambelele egi: ‘Ngudi gumiwambela egi ame yowu. Bembenu athu awa aye gawo.’

Tangua Phetelo wakotelesele ndaga yakhalele mukalegewa, wazolele phogo ya khusa, wakokele kutshi dia Malekuse, muenya mudimo wa nganga-nzambi wakoma. Uvi Yesu wakuatele kutshi dia muthu muene, wamusagele. Wawambelele Phetelo egi: ‘Vutula phogo yaye. Gula udi mulua nu phogo, mbawushiyiwa nji nu phogo.’ Masuta akuatele Yesu, amujitshigile shinga gu mago, apostolo alengele. Abatele Yesu gudi fumu wa nganga-nzambi mumoshi, jina dienji Ana. Ana wahudile Yesu mihu, gungima wamutumile gudi Nganga-nzambi Wakoma Kayifa. Uvi ndaga itshi yabuidile apostolo?