Nga Gima Gimoshi Giaakangelego Njila ha Gulongesa

Guakhalele nu yala mumoshi wakhalele malu a gufua, wakhalele mutoga athu makuta ha mufulo wa tempelo lusugu nu lusugu. Lusugu lumoshi, gungima dia midi wamonele Phetelo nu Yone muya mu tempelo. Yala muene waawabelele egi: ‘Ngabuba, nguhanenu gima giagasue mudi nagio.’ Phetelo wazuelele egi: ‘Ngudi nu gima gimoshi gia guguhana giabalega makuta. Ngudi guguwambela mu jina dia Yesu egi, zuga uwende!’ Gungima Phetelo wamukuatesele ha guzuga, yala muene wasendesele guwenda! Athu asuangulugile muavula mukunda nu ndaga yene ya gushimana, athu avula abuile alandudi.

Uvi nganga-nzambi nu Asadoke avile khabu. Akuatele apostolo, a abatele gu tribinale, a ahudile egi: ‘Nanyi wamihanyi ngolo jia gusaga yala yowu?’ Phetelo wazuelele egi: ‘Yesu Klisto munu muashiyile, muene watuhanyi ngolo.’ Mafumu a ikombelelo a abalediele egi: ‘Mutangigo luko jina dia Yesu!’ Uvi apostolo azuelele egi: ‘Tumukhala muzuela mu jina dienji. Mbatushigo mubemba nga hazonda.’

Tangua a abembele, Phetele nu Yone ayile gudi alandudi ako a awambelele ndaga jiagasue jiaabuidile. Akombelele hamoshi, atogele Yehowa egi: ‘Tuabuba, tuhane gikhesa giavula hagula tulandule gutshita mudimo waye.’ Yehowa waahanele nyuma yenji. Alanduile gulongesa nu gusaga athu. Athu avula diago akhalele mubua alandudi. Asadoke akhalele muvua giphi, hene akuatele apostolo a ambile mu bologo. Uvi Yehowa watumile muanjelo mu phipha yene, wakangudile mufulo wa bologo, wawambelele apostolo egi: ‘Ndenu mulongese mu tempelo.’

Mu gimenegena gialanduile enya Sanedrene, mafumu a ikombelelo anyi a asophesele ahudile egi: ‘Bologo didi dia gukanga, uvi athu akuatewa ashigo mukatshi! Adi mulongesa athu mu tempelo!’ Akuatele luko apostolo a abatele gu Sanedrene. Nganga-nzambi wakoma wazuelele egi: ‘Tuamitunyishile egi mushigo naye gulongesa mu jina dia Yesu!’ Uvi Phetelo wavutudile egi: “Tudi naye gutumagela Nzambi uvi athu ndo.”

Mafumu a ikombelelo avile khabu jiavula, akambele luholo lua gushiya apostolo. Mufalese mumoshi jina dienji Gamaliele, wazugile mu molu, wazuelele egi: ‘Temenu gu ndaga mudi mutshigina gutshita! Athu awa ajiya gukhala athu a Nzambi. Mudi diago mutshigina guluisa Nzambi ba?’ Atshiginyile matangi enji. Atamegele apostolo, a abetele fimbo, a awambelele egi ashigo naye luko gulongesa, gungima a abembele ha guya. Uvi apostolo abembelego gulongesa. Alanduile gulongesa lukuma luabonga nu gikhesa giagasue mu tempelo nu mu inzo nu inzo.