Phaula nu Timote

Timote wakhalele muvuala wa yala mu hungu dia gu Listre. Sh’enji wakhalele muenya Greke, uvi gin’enji wakhalele muenya Yuda. Gin’enji Enise nu khakh’enji Loise amulongesele ndaga jia Yehowa hakhalele muene mona wa zonda.

Tangua Phaula wayile mutala hungu dia gu Listre mu vuayaje yenji ya mbadi, wakotelesele egi Timote wakhalele muzumba diago aphangi nu wakhalele nu nzala yakola ya guakuatesa. Phaula wawambelele Timote ha guya n’enji mu vuayaje ha gulongesa lukuma luabonga. Gungima wamuhanele formasio ha gubua muzuedi nu mulongeshi wabonga wa lukuma luabonga.

Nyuma yakhalele mutuameza Phaula nu Timote fundo diagasue akhalele muya. Mu phipha imoshi, yala mumoshi wawambelele Phaula mu vizio ha guya gu Masedonia ha guakuatesa. Hene Phaula nu Timote nu Silase ayile guene ha gulongesa lukuma luabonga nu ha gukangula mahungu ahe-ahe.

Athu avula a mu dimbo dia Masedonia gu Tesalonike, mala nu akhetu abuile Aklisto. Uvi enya Yuda ako akhalele muvila Phaula nu mafuta enji giphi. Abungishile mbundudi, jiananele aphangi uu nu gutuama dia mafumu a dimbo, azuelele egi: ‘Athu awa adi mbalagaji jia ufumu wa gu Roma!’ Monyo wa Phaula nu Timote wakhalele mu gingoza, hene alengele, ayile gu Berea mu phipha yene.

Enya gu Berea akhalele nu nzala ya guvua lukuma luabonga. Enya Greke nu enya Yuda akhalele guene, asendesele gusha gutshigina gudi Yesu. Uvi enya Yuda ako akatugile gu Tesalonike, ayile muzola matululu, hene Phaula wayile ngenyi gu Atene. Timote nu Silase asalele gu Berea ha guhana aphangi gikhesa. Mu tangua dimoshi ngenyi, Phaula watumile Timote gu Tesalonike ha gukuatesa aphangi akhalele mutagana nu usageshi wakola. Gungima Phaula watumile Timote ha guya mutala mahungu avula ha guhana aphangi gikhesa.

Phaula wawambelele Timote egi: ‘Athu agasue adi mutshigina gukalegela Yehowa, mbaasagesewa.’ Timote nji wasagesewe, wambiwe mu bologo mukunda nu gutshigina guenji. Uvi wakhalele nu gusuanguluga handaga wahetele luendu lua gumonesa egi wakhalele ya gujinginyina gudi Yehowa.

Phaula wawambelele enya gu Filiphi egi: ‘Ngudi gumitumila Timote. Mbawumikuatesa ha guwenda mu giamatshidia nu mbawumihana formasio ha gutshita muabonga mudimo wa gulongesa.’ Phaula wakhalele mushila Timote mutshima. Akhalele mafuta akola, atshitshile mudimo hamoshi ivo yavula.