Longesa Mbimbi ya Nzambi nu gamukanda Mene Jiabonga Jiakatuga Gudi Nzambi!
1. Gamukanda Mene Jiabonga gasonegewe hagukalegewa luholo lutshi?
1 Luholo Mudimo Wa Ufumu wa mbeji ya 7 wazuelele, gamukanda Mene Jiabonga Jiakatuga Gudi Nzambi! gadi gikalegelo giabonga gia gulongesela mbimbi ya Nzambi. Hagukuatesa athu tuana gulongesa atange mu Biblia, mbimbi jia maverse ahagewa jishiko jiagusonega mu paragrafe. Mikanda iko tuana gulongesela Biblia yasonegewe hagula muthu ajiye guyitanga nga hakhenji, uvi gamukanda Mene Jiabonga Jiakatuga Gudi Nzambi! gasonegewe hagula mulongeshi agatange nu muthu ana gulongesa. Hakiene, gula tuahana muthu gamukanda gene, tudi naye gumuleza luholo tuana gu gakalegela mu ulongeshi wa Biblia hagula muthu muene ajiye egi gulonguga gua Biblia gudi mulonga wagusuanguluisa.—Mat. 13:44.
2. Luholo lutshi tuajiya gukalegela gamukanda Mene Jiabonga mu lusugu lua thomo tuadimona nu muthu?
2 Gudimona gua Thomo: Wajiya guzuela egi: “Ngeza gumitala handaga athu avula adi nu gikenene mukunda nu masugu adi guza. Watangiza egi gudi lusugu ndaga mba jibalumuga ba? [Mu bembele tangua dia guhana mvutu.] Mu Biblia mudi mene jiajiya gutuhana felela diabonga. Biblia yana guhana mvutu gu mihu eyi.” Hana muthu muene mukanda, muleze atombe muhu umoshi gu mihu idi gu ngima dia diyiji dia suga. Gila muthu muene watomba mukhapho umoshi, kalagala paragrafe ya thomo ya mukhapo wene hagumuleza luholo lua gulonguga. Wajiya luko guhula muhu udi mu mukhapo umoshi wa gamukanda Mene Jiabonga; gungima leza luholo gamukanda gene gajiya gukuatesa haguheta mvutu mu Biblia. Gila mukapho wene wadiva nu video imoshi mu site Internet yetu jw.org, alongeshi ajiya guleza athu adi guzuela nawo video yene.
3. Monesenu luholo lua gukalegela gamukanda Mene Jiabonga hagulongesa athu Biblia.
3 Luholo lua Gulongesa Muthu: (1) Tanga muhu udi nu nimero mu isona yakoma yabwita, hagukuatesa muthu muene ajiye mulonga wa ndando. (2) Tanga paragrafe idi goshi’a muhu wene. (3) Tanga baverse adi mu isona ya guzendelela (italique) adi gu suga ya paragrafe, muhule mihu nu gutema guagasue hagumukuatesa ajiye luholo baverse ene adi guhana mvutu gu muhu wene udi nu nimero. (4) Gila gudi paragrafe jiyadi nga jitatu goshi’a muhu wa nimero, vutugila luko ndaga tuamona mu gitshinyi 2 nu 3. Gila video imoshi yadiva nu muhu wene, gila muthu muene khenji atalele video yene ndo, mutadise nayo. (5) Hagusugisa, hula muthu muene muhu udi nu nimero hagujiya gula wakuatshi.
4. Gima gitshi giajiya gutukuatesa tukalegele muabonga gamukanda Mene Jiabonga?
4 Jiya gamukanda gene muabonga. Ga kalegele mu mudimo wagulongesa. Hagusendesa gulonguga, tangiza thomo milonga yatadila muthu muene wana gulongesa nu luholo luabonga lua gumukotelesa baverse a Biblia adi mu mukhapho wene. (Ish. 15:28; Makal. 17:2, 3) Gula wakalegela gamukanda Mene Jiabonga muavula, wajiya gumona lume egi gadi gikalegelo giabonga gia gulongesela athu matshidia!