MAKALEGELO A UKLISTO

Ndaga Jihe-jihe mu Gudibungisa Guetu gua Mukhatshi dia Phoso

Sendese mu mbeji ya Janvier 2018, mu gudibungisa guetu gua mukhatshi dia phoso, mbatusendesa gutadila ndaga jidi mu site jw.org. ha fundo diasonegewa egi notes d’étude et media mu Biblia—Les Saintes Écritures. Traduction du monde nouveau (nwtsty). Muajiya gulonguga ndaga jiene ngatshima mushigo nu Biblia eyi mu zuelelo dienu. Yadiago, ndaga eji mbajimikuatesa muavula ha gudilondega muabonga mukunda nu gudibungisa. Luko, ndaga jiene mbajimikuatesa ha gusuena luko muavula hehi nu Yehowa, tata wetu wa guzumba!

NOTI JIA GULONGUGA

Ndaga jia gulonguga mbajitukuatesa ha gukotelesa muabonga makalegelo, membo nu mafundo, nu mazuelelo a athu adi muzuelewa mu verse jia Biblia.

Matayo 12:20

Shinga ya lino idi mulema: Muenda wakhalele mukalegela athu wakhalele gabungu gazonda ga mavu gazala pha nu maji a olive. Wakhalele nu shinga yakhalele munana maji mukunda nu gulemesa tshuya. Mu zuelelo dia Greki, mbimbi “shinga ya lino idi mulema” jidi muhana matangi a shinga idi muzola mishi handaga makala ayo adi nu tshuya, ngatshima dimi dia tshuya didi mushiginyina nga didi dia gufua. Profesi idi mu mukanda wa Yeshaya 42:3 ya diangele guzuelela khenda jia Yesu. Muene mbagajimigo nga hazonda felela dia athu a gudibulumuisa nu adi musagesewa.

Matayo 26:13

Ikhale ngenyi: Mu zuelelo dia Greki, mbimbi a·menʹ, eji jiana gutangewa mu Hebelu egi ʼa·menʹ, jidi mukotelesa egi “ikhale ngenyi,” nga ndo “yadiago.” Yesu wakalegele mbimbi jiene iphungu yavula gutuama dia guzuelela ndaga imoshi, gutuama dia guhana laji dimoshi nga profesi imoshi. Ngenyi, wamonesele egi ndaga jiene jiakhalele diago jia giamatshidia, nu jiatagana ha gujishila mutshima. Mu Biblia, gushigo nu muthu muko wakhalele mukalegela mbimbi “ikhale ngenyi,” nga amen, gifua Yesu ndo. Gula ajivutugila (a·menʹ a·menʹ), gifua luholo jidi jia gusonega iphungu yavula mu Evanjile ya Yone, mbimbi jia Yesu jidi mukotelesa egi “ikhale diago ngenyi.”—Yone 1:51, NW.

MEDIA

Foto, ifuanesa, nu video jia mbimbi nu jinyi jishigo nu mbimbi jidi mumonesa ndaga jiavula Biblia yana guzuelela.

Bethphagé, Mulundu wa Olive, nu Yelusalema

Video eyi idi mumonesa njila idi hehi nu Yelusalema gu khanda ya esti, nu mu dimbo dia et-Tour—yajiya gukhala egi hene hakhalele dimbo dia Bethphagé didi muzuelewa mu Biblia—diago diakhalele holu dia Mulundu wa Olive. Dimbo dia Betaniya diakhalele gu esti ya Bethphagé, gu khanda ya mbongo ya esti ya Mulundu wa Olive. Tangua Yesu nu alandudi enji akhalele gu Yelusalema, akhalele muya mubanda gu Betaniya. Mangino dimbo diene diana gutamegewa egi el-ʽAzariyeh (El ʽEizariya ); jina edi dia katuga mu zuelelo dia Arabe, didi mukotelesa egi “Fundo dia Lazalo.” Tudi mujiya diago egi Yesu wakhalele gumbo dia Marta, Mariya nu Lazalo. (Mat 21:17; Mako 11:11; Luka 21:37; Yone 11:1) Yajiya gukhala egi tangua Yesu wakhalele mukatuga gumbo diawo ha guya gu Yelusalema, wakhalele muyila mu njila gifua eyi ya monesewa mu video eyi. Habalegele Yesu gu mulundu wa Olive holu dia shitu ya phunda ha guya gu Yelusalema mu lusugu lua 9 lua mbeji ya Nisana mu givo 33 gia tangua dietu, yajiya gukhala egi wabalegele thomo gu Bethphagé.

Njila idi mukatuga gu Betaniya ha guya gu Bethphagé
Bethphagé
Mulundu wa Olive
Baba dia Kidelona
Tempelo ya Mulundu

Musumadi mu gidiatelo

Eyi foto ya gifuwa gia gidiatelo gia muthu gia gukhokha musumadi wa 11.5 cm. Musumadi wa luholo elu wamonewe mu givo 1968, gu nordi ya Yelusalema tangua dimbo diene dia muangewe, sendese mu tangua dia enya Roma. Musumadi owu wamonele ba archéologues udi mumonesa diago egi akhalele mukalegela misumadi ha gukhokha muthu holu dia gitshinyi gia mutshi. Musumadi owu wajiya gukhala luholo lumoshi nu musumadi masuta a enya Roma a khokhele Yesu holu dia mutshi. Musumadi wene wamonewe mu gamushete ga seso, gakhalele mutamegewa egi ossuaire, muene muakhalele mubambewa ifuwa ya gumigina ya muthu wa gufua gula muila wenji wafukha. Idi mumonesa egi muthu wakhalele mushiyiwa holu dia mutshi, akhalele gumufunda.—Mat 27:35.