Luholo Lutshi Wajiya Gukamba Thomo Guhuima nu Phangi’aye?

Tangiza egi udi mujinga gu Galile, mu tangua dia Yesu. Waya gu Yelusalema mukunda nu Wano wa Isasa. Dimbo dia Yelusalema didi diazala pha nu Aklisto akatuga mu membo a gualeha. Udi mutshigina guhana mulambu waye gudi Yehowa. Hene, waza nu khombo yaye, wangina mu mulongo wa athu avula adi muya gu tempelo ha guhana milambu. Tangua waheta, wasanga tempelo yazala pha nu athu ako adi mutshigina guhana milambu yawo. Henyaha, tangua dia guhana mulambu waye wa khombo gudi nganga-nzambi diatagana. Mu tangua diene, wawunguluga egi udi nu ndaga nu phangi ’aye mumoshi; muene udi mukatshi dia athu adi muhana milambu nga ndo udi ha fundo diko mu dimbo. Yesu wamonesele ndaga udi naye gukalagala mu tangua dinyi. (Tanga Matayo 5:24.) Luholo lutshi aye nu phangi udi nenji ndaga, muajiya gukamba guhuima gifua luholo luazuelele Yesu? Tomba mvutu yataga mu ndaga jia sonegewa ha mbongo haha.

UDI NAYE . . .

• guzuela nu phangi’aye phamba gula wamona egi muene udi diago nu gishina gia guvua khabu

• gukamba luholo lua gukuatesa phangi’aye gula wamona egi gisegela gia mubalegela

• gutegelela phangi’aye nu guhuiminyina guagasue tangua gadi muzuela, ngatshima ushigo diago mukotelesa ndaga jidi muene muzuela. Luko, mutoge agutotesele gubola guaye mukunda nu ndaga wa mukalegela idi gumusagesa

PHANGI’AYE UDI NAYE . . .

• guwambela Aklisto ako mu hungu gubola wamukalegela, hagula ene amukuatese

• gugubalela, guguwambela gubola guagasue wamukalegela, nu gugutuma ha gutshigina gubola guaye

• gujiya luholo wa dibulumuisa nu gikhesa wamonesa ha guya gumumona ha guta nenji maga. Udi naye nji gugutotesela nu mutshima wagasue

Mangino, gikombelelo gietu gianago gutoga egi tuhane milambu ya shitu. Uvi luholo lutshi ndaga jia longesele Yesu jidi mumonesa egi gula tudi mukamba guhuima nu phangi’etu, Nzambi wajiya gutshigina gukombelela guetu?