Mihu Yana Guhula Athu Ana Gutanga Mikanda Yetu

Tangua ditshi Yesu gabuile Nganga-nzambi Wakoma? Gudisha gutshi gudi mukatshi dia tangua gikotelo gihe-gihe giatshiginyiwe nu tangua giasendesele?

Gudi nu ndaga jidi mumonesa egi Yesu wabuile Nganga-nzambi Wakoma tangua gabatijiwe mu givo 29 gia T.D. Luholo lutshi tuayijiya? Tangua Yesu gabatijiwe, wamonesele egi udi hehi ha guhana monyo wenji gifua mulambu ha giwotshielo gia gifuanesa ha gutagenesa ‘felela’ dia Nzambi. (Gal. 1:4; Heb. 10:5-10) Luholo giwotshielo giakhalele gima gia ndando mu tempelo, idi mumonega egi tempelo ya mu nyuma yasendesele tangua diabatijiwe Yesu. Tempelo yene idi mumonesa ndaga jiagasue jidi gutukuatesa ha gukombelela Yehowa mu luholo luatagana mu njila ya mulambu wa Yesu.—Mat. 3:16, 17; Heb. 5:4-6.

Luholo tempelo yakoma ya mu nyuma idi guene, Nganga-nzambi Wakoma nji udi naye gukhala guene. Ha gutagenesa ndaga eyi, Yehowa wambile Yesu ‘maji mu nyuma mu ngolo jienji.’ (Makal. 10:37, 38; Mako 1:9-11) Luholo lutshi tuajiya gutshigina egi Yesu wambiwe maji mu nyuma gifua Nganga-nzambi Wakoma gutuama dia gufua nu gufuzumuga guenji? Gifezegeselo gia Alona nu gia Nganga-nzambi jiko jiajile gungima dienji, giza gutukuatesa ha guhana mvutu (kueteya) gu muhu wene.

Mukhuala wa Moize wakhalele muzuela egi, phamba Nganga-nzambi Wakoma wakhalele naye gungina mu fundo Diabalega Gijila mu inzo ya tenta, nga mu tempelo. Gima giakhalele mukhaphumuna fundo Diabalega Gijila nu fundo dia Gijila giakhalele rido. Nganga-nzambi wakhalele mubalega ha rido yene phamba mu Lusugu lua gutotesela gubola. (Heb. 9:1-3, 6, 7) Luholo Alona nu athu agasue amulanduile ambiwe maji mu nyuma ha gubua Nganga-nzambi jiakoma ‘gutuama dia gubalega rido’ nu gungina ha fundo Diabalega Gijila mu inzo ya tenta, Yesu nji wakhalele naye gumbiwa maji mu nyuma gifua Nganga-nzambi Wakoma wa mu tempelo ya koma ya Yehowa gutuama egi afue nu gutuama dia gubalega ‘rido idi mumonesa muila wenji’ ha guya mu dilu. (Heb. 10:20) Gishina giene, mupostolo Phaula wazuelele egi Yesu wajile ‘gifua nganga-nzambi wakoma’, gungima wanginyine ‘mu inzo ya tenta yakoma nu yatagana inyi yakalegewego nu mago’ ha gungina “mu dilu.”—Heb. 9:11, 24.

Gudisha gushigo guene mukatshi dia tangua gikotelo gihe-gihe giatshiginyiwe nu tangua giasendesele. Mukunda natshi? Yesu wahanele monyo wenji watagana mukunda nu esue, hene, hayile muene mu dilu, wakalegele ndaga ya thomo mukatshi dia ndaga thathu yakhalele mutagenesa nga gutshiginyisa gikotelo gihe-gihe. Ndaga ya thomo yakalegele muene yene yakalegele egi gikotelo egi gizule ndando nga ndo gisendese. Ndaga itshi yene gakalegele?

Thomo, Yesu wamonegele gu phala ya Yehowa; gungima, wamonesele ndando ya mulambu wenji gudi Yehowa; Yehowa watshiginyile ndando ya mulambu wa mahatshi a Yesu. Tangua ndage eji jiakalegewe, gikotelo gihe-gihe giakhalele khenji gisendesago.

Biblia yanago gutumonesa diago tangua Yehowa gatshiginyile ndando ya mulambu wa Yesu. Hene, tuajiyilego gumonesa diago tangua gikotelo gihe-gihe giatshiginyiwe nu giasendesele. Uvi, tuana gujiya egi Yesu wayile mu dilu masugu kumi gutuama dia Pantekote. (Makal. 1:3) Yajiya gukhala egi mu tangua diene, Yesu wamonesele ndando ya mulambu wenji gudi Yehowa, nu muene wawutshiginyile. (Heb. 9:12) Tudi mujiya ndaga eyi mukunda nu ndaga jiakalegewe mu Pantekote ya givo 33 gia T.D. (Makal. 2:1-4, 32, 33) Gikotelo gihe-gihe giasendesele gukalagala mudimo wenji.

Tuakotelesa egi, gikotelo gihe-gihe giatshiginyiwe nu giasendesele tangua Yehowa gatshiginyile ndando ya mulambu wa mahatshi a Yesu. Yesu Nganga-nzambi Wakoma watagenesele gikotelo gihe-gihe, nu wakhala mutageneshi wa athu nu Nzambi.—Heb. 7:25; 8:1-3, 6; 9:13-15.