Amonele Guzumba gua Aphangi

YOMARA nu aphangi enji a mala Marcelo nu Hiver ana jinga gu gadimbo gamoshi gazonda gu Guatemala. Yomara wasendesele gulonguga Biblia nu Matemue a Yehowa, gungima aphangi enji a mala asendesele nji gulonguga Biblia. Uvi yakhalelego yaleba ha gulonguga handaga mukut’awo agasue thathu akhalele ifofo, akhalelego nji mujiya gutanga braille. Uvi muthu wakhalele gualongesa Biblia wakhalele guatangela ba paragrafe nu verse jiakhalele mu longo akhalele mulonguga.

Yakhalele lamba gudi ene ha guya mu gudibungisa gua mu hungu. Ene hakhawo akhalelego nu luholo lua gutshita minuta 40 ha guya gu Inzo ya Ufumu. Uvi aphangi akhalele muza guazula ha guya nawo mu gudibungisa guagasue. Tangua asendesele gutshita ba devuare mu gudibungisa gua mukatshi dia phoso, aphangi akhalele guakuatesa ha gukuata ndaga jia guzuela mu muto.

Mu Mai 2019, asendesele gukalagala gudibungisa gua mu hungu mu dimbo diawo. Gungima phangi mumoshi wa yala nu mukaji’enji akhalele avundji a njila a tangua diagasue ayile mu dimbo diene. Phangi muene wa yala nu mukaji’enji akhalelego mujiya gutanga nu gusonega braille, uvi akhalele mutshigina gukuatesa ifofo yene thathu ha gujiya gutanga nu gusonega braille. Hene ayile mu biblioteke ha gulonguga luholo lua gulongesa athu ako braille.

Gungima dia mbeji jiazonda, aphangi ene thathu a ifofo asendesele gutanga braille muabonga, ndaga yene yaakuatesele ha gukula mu nyuma.a Henyaha phangi Yomara nu Marcelo nu Hiver adi avundji a njila a tangua diagasue. Marcelo udi nji mukuateshi wa mudimo. Phoso nu phoso ana gudihana muavula mu ndaga jia mu nyuma. Gikhesa giawo giana kuatesa nji athu ako ha gudihana muavula mu mudimo wa Yehowa.

Aphangi ene thathu adi muhana mersi luholo aphangi a amonesele guzumba mu hungu. Phangi Yomara udi muzuela egi: “Tangua tuadimonele nu Matemue a Yehowa mu mbala ya thomo, atumonesele guzumba gua Aklisto a giamatshidia.” Phangi Marcelo udi muzuela egi: “Tudi nu mafuta abonga mu hungu, tudi nji mu fami ya Matemue a Yehowa ya ha mavu a mudidi ana gudimonesela guzumba.” Yomara nu aphangi enji mbadi a mala adi munengenena ha gumona luholo Yehowa mbawubuisa mavu phaladiso.​—Ngi. 37:10, 11; Yesh. 35:5.