Wana Guyijiya Ba?

Phusu-phusu ya luholo lutshi muenya gu Etiopi wakhalele muwendesa tangua Filipho wasuenele gudi muene?

Mbimbi ya Greke yabalumuiwe mu Traduction du monde nouveau egi “phusu-phusu” yajiya gumonesa phusu-phusu jia maluholo agudisha. (Makal. 8:28, 29, 38) Uvi idi naye gukhala egi, phusu-phusu inyi muenya gu Etiopi wakhalele muwendesa yakhalele yakoma gubalega phusu-phusu jiazonda ana kalegela gu ita nga ha zudila phushi. Tutadilenu ndaga jiazonda jidi gututuma ha guzuela ngenyi.

Muenya gu Etiopi munu wawendele njila yaleha, wakhalele nu ufumu wavula. Wakhalele “mukalagala mudimo gumbodia Kandake, fumu-mukhetu wa gu Etiopi. Wakhalele nji mutala umonyi wagasue wa fumu muene.” (Makal. 8:27) Gifutshi gia Etiopi gia mu tangua dikulu gidi mumonesa mangino gifutshi gia Soudan nu gitshinyi giakoma gia gu khanda ya sud ya Ejipitu. Idi naye gukhala egi muthu muene gatshitshilego vuayaje yenji yagasue mu phusu-phusu imoshi, handaga wakhalele nu ima yavula yajiya gumukuatesa mu njila yene. Mukatshi dia phusu-phusu jiakhalele mukalegewa mu siekle ya thomo G.Y. ha gubatela ima, guakhalele nu phusu-phusu jia pine nguana. “Idi naye gukhala egi phusu-phusu jia luholo elu jiakhalele nu fundo dia gubatela makuba nu ima iko. Yajiya gukhala egi phusu-phusu jiene jiakhalele mukuatesa athu ha guwenda njila yaleha,” gifua luholo muenya ndunge mumoshi wamonesele ndaga yene mukunda nu mukanda wa Makalegelo.

Muenya gu Etiopi wakhalele mutanga tangua Filipho wasuenele gudi muene. Lumene luene luana sendesa egi “Filipho wayile phushi hehi nu phusu-phusu yene, wavile [muenya gu Etiopi] mutanga mukanda wa profete Yeshaya.” (Makal. 8:30) Phusu-phusu jia gutshitshila vuayaje jialondewego mukunda nu guwenda phushi jiabala. Luholo jiakhalele muwenda mage-mage, yakuatesele muenya gu Etiopi ha guya nu gutanga, yahanele nji Filipho njila ha guyikuata ngatshima wakhalele muwenda ha malu.

Muenya gu Etiopi “wawambelele Filipho ha gungina mu phusu-phusu yenji. Filipho wanginyile, wakhalele.” (Makal. 8:31) Muthu wana guwendesa phusu-phusu ya guzudila phushi, udi naye gukhala yagumagana. Uvi idi naye gukhala egi mu phusu-phusu yalondewe ha gutshitshila vuayaje, yakhalele nu fundo dia gukhala dinyi muenya gu Etiopi nu Filipho akhalele.

Mu mikanda yetu ya mu ivo yabalega, tuamonesele ifuanesa ya muenya gu Etiopi udi muwendesa phusu-phusu yakoma gubalega jinyi athu akhalele mukalegela ha guzula phushi mu gudivua nu ndaga mukanda wa Makalegelo mukhapho 8 wana guzuela nu mene jiko jikulu.