Mihu Yana Guhula Athu Ana Gutanga Mikanda Yetu
Mbimbi eji: ‘Mbawaabamba’ jidi mu Ngimbo 12:7 jidi muzuelela ‘athu adi nu gikenene’ (mu verse 5) nga jidi muzuelela ‘mbimbi jia Yehowa’ (mu verse 6)?
Verse jidi guthunda nu gu mbongo jidi mumonesa egi verse yene idi muzuelela athu.
Mukanda wa Ngimbo 12:1-4 udi muzuela egi: ‘Athu a gujinginyina ashigo luko mukatshi dia athu.’ Uvi Ngimbo 12:5-7 idi muzuela egi:
“‘Handaga athu adi nu gikenene adi musagesewa,
Handaga athu adi uphutu adi mumonesewa lamba,
Yehowa udi muzuela egi ngudi muza guakatula mu lamba.
‘Mbanguahuluisa ha mago a athu adi guasegulula.’
Mbimbi jia Yehowa jidi jiaphelegeta;
Jidi gifua utadi wa siliva wa phelegetesewa mu fulu ya tshuya mu mavu mbala 7.
Yehowa, aye mbawaabamba;
Mbawubamba muthu wagasue mukatshi diawo mu gindongo egi sendese mangino uu nu mu masugu adi muza.”
Verse 5 idi mumonesa ndaga Nzambi mbawukalagala mukunda nu “athu adi mumona malamba.” Mbawahuluisa.
Verse 6 idi muzuela luko egi, ‘mbimbi jia Yehowa jidi jiatagana gifua utadi wa siliva wa phelegetesewa.’ Ndaga jiene jidi mumonesa luholo tuana gudivua mukunda nu mbimbi ya Yehowa.—Ngi. 18:30; 119:140.
Henyaha tutadilenu ndaga jidi mu verse yalandula, Ngimbo 12:7 idi muzuela egi: ‘Yehowa, aye mbawaabamba; Mbawubamba muthu wagasue mukatshi diawo mu gindongo egi sendese mangino uu nu mu masugu adi muza.’ Mbimbi ‘mukatshi diawo’ jidi muzuelela akhuatshi?
Luholo verse 6 idi nu ‘mbimbi jia Yehowa,’ athu ako ajiya guzuela egi mbimbi ‘mukatshi diawo’ jidi mbimbi jia Nzambi gifua luholo verse 7 idi guyimonesa. Tudi mujiya muabonga egi Yehowa wabambele Biblia ikhale mbalagaji jienji jiatshitshile ngolo ha guyitunyisa nga guyibolesa.—Yesh. 40:8; 1 Phet. 1:25.
Uvi ndaga jidi muzuelewa mu verse 5 jidi nji jia giamatshidia, handaga Yehowa wakuatesele nu mbawulandula gukuatesa athu adi nu ‘gikenene nu anyi adi mumonesewa lamba’ nu mbawaahuluisa.—Yobo 36:15; Ngi. 6:4; 31:1, 2; 54:7; 145:20.
Uvi athu adi ‘mukatshi diawo’ adi muzuelewa mu verse 7 adi akhuatshi?
Ndaga jidi mu mukhapho owu jidi mumonesa egi mbimbi ‘mukatshi diawo’ jidi muzuelela athu.
Ngimbo 12:1 idi muzuelela akombeledi a Yehowa anyi ahuigiwe gudi athu abola. Gungima, Yehowa udi muzuela egi mbawuhana ndola gudi athu ana zuela ndaga jiabola mukunda nu akombeledi enji. Mukanda wa ngimbo mukhapho 12 udi gutukuatesa ha gushila Yehowa mutshima egi mbawukuatesa akombeledi enji, handaga mbimbi jienji jidi jiatagana ha gushila mutshima.
Athu anyi Yehowa mbawubamba, adi athu adi nu gikenene handaga athu abola adi guamonesa lamba gifua luholo verse 7 idi guyimonesa.
Mbimbi eyi: ‘mbawaabamba’ yasonegewe mu verse eyi yazudiwe mu kopi jia ba rulo a Hebelu (texte massorétique hébreu). Uvi mu Biblia yabalumuiwe mu zuelelo dia Greke yana tamegewa egi La Septante, abalumuine mbimbi yene mu verse 7 mbala mbadi egi: ‘mbawutubamba.’ Verse yene idi muzuela egi Nzambi mbawubamba ‘muthu wagasue’ wa gujinginyina udi nu gikenene nu udi mumonesewa lamba, mbawaamba ‘mu gindongo egi’ gudi athu adi guamonesa lamba. (Ngi. 12:7, 8) Biblia ya zuelelo dia Alama yana tamegewa egi Targums yabalumuine verse 7 egi: “O FUMU, aye mbawubamba athu abonga, mbawabamba gu gindongo egi gia athu abola mayilago. Athu abola adi mafundo agasue gifua zambo didi munua mahatshi a athu.” Verse eyi idi mumonesa egi mbimbi jidi mu mukanda wa Ngimbo 12:7 jishigo jia Nzambi.
Uvi verse yene idi muhana felela gudi ‘athu agujinginyina’ gudi Nzambi egi muene mbawakuatesa.