Ndaga Jiajiya Gugukuatesa ha Gulonguga Biblia Phoso nu Phoso
YANA khala lamba mukunda nu aye ha gulonguga Biblia phoso nu phoso ba? Matangua ako wana mona gifua gulonguga Biblia guanago gugusuanguluisa ba? Matangua ako mukut’etu agasue tuana gudivua ngenyi. Uvi tangiza gale ndaga tuana tshita lusugu nu lusugu gifua guzua meya. Guzua meya guana toga tangua nu ngolo uvi tuana gudivua muabonga gula tuazua meya! Gulonguga Biblia guajiya gukhala guabonga gifua muthu udi “gudiweva nu meya a mbimbi ya Nzambi.” (Ef. 5:26) Tutadilenu ndaga jiajiya gutukuatesa:
Khala nu programe yabonga. Tuana jiya muabonga egi gulonguga Biblia gudi mukatshi dia “ndaga jiabalega ndando” tudi naye gutshita. (Fili. 1:10) Ha gugukuatesa ha gutuna gubuita programe yaye mutshima, sonega lusugu nu tangua gu papie ihage ha fundo dinyi wajiya gumona muabonga. Nga ndo wajiya gumba alarme gu telefone yaye tangua diazonda gutuama dia gusendesa gulonguga.
Tomba tangua diabonga nu metode abonga ajiya gugukuatesa ha gulonguga. Yana khala ndaga yaleba gudi aye ha gutuna guwunganesa matangi tangua udi mubalegesa tangua diavula nga diazonda ha gulonguga ba? Aye hakhaye wana jiya matangua aye muabonga. Tomba tangua udi mumona egi didi diabonga mukunda nu aye. Gula wamona egi ushigo gudivua muabonga ha gulonguga mu tangua watombele, wajiya guzula nga minuta 10 ha gulonguga. Gula udi mubalegesa minuta 10 ha gulonguga idi yabonga gubalega muthu gashigo mulonguga. Gungima dia gubalegesa minuta 10, wajiya gusuanguluga nu ndaga walonguga ngenyi yajiya guguhana gikhesa ha gulandula gulonguga.—Fili. 2:13.
Tomba gutuama ndaga udi naye gulonguga. Gula ushigo mujiya ndaga udi naye gulonguga gutuama, mba ushigo ‘mukalegela tangua mu luholo luabonga’ (Ef. 5:16) Wajiya gutshita liste ya ndaga udi mutshigina gulonguga. Ha gufezegesa, gula ushigo mukotelesa ndaga imoshi muabonga, wajiya guyisonega mu liste yene. Gula wamanesela gulonguga, wajiya gulunda matangi ako mu liste ya ndaga udi mutshigina gulonguga luko.
Khala musombegesa gula luholo ludi guene. Wajiya gusombegesa ndaga jiko mu programe yaye. Ha gufezegesa, wajiya gusombegesa tangua wana balegesa ha gulonguga nga ndaga wana tomba ha gulonguga. Ndaga ya ndando ishigo tangua wana longuga, guvula gua matangua wana balegesa ha gulonguga nga ndaga udi mu longuga uvi idi gulonguga phoso nu phoso.
Tuana heta diago gubonga guavula gula tudi mulonguga phoso nu phoso. Tuana kolesa ufuta wetu nu Yehowa nu tuana longuga ha gutshita ndaga nu gutema, tuana heta nji gikhesa.—Yosh. 1:8.