Longi dia 5

Mafuta A Nzambi Mbaajinga Mu Phaladisu

Phaladisu mba dishi mukhalago gifua gifutshi gi tumujinga luenyelu. Nzambi gatshiginyile ndo egi mavu azale nu mavwanga nu madilo, nu phashi nu malamba. Mu masugu amuza gumatuama, Nzambi mbawumulonda mavu agasue phaladisu. Phaladisu yene mba ikhala luholotshi? Tutalenu gale ndaga imuzuela Bibila:

Athu abonga. Phaladisu mba ikhala inzo ya mafuta a Nzambi. Mbaatshita ima yabonga mukunda nu ako. Mbaajinga mu gulandula mikhuala ya bonga ya Nzambi.​—Ishima 2:21.

Ima ya gudia mbaikhala yavula. Mu phaladisu, nzala mba ishimukhalago. Bibila didi muzuela egi: “Mavu azolese bule [“ima ya gudia,” NW] yavula.”​—Ngimbo 72:16.

Jinzo jiabonga nu midimo yatagana. Mu Phaladisu dia ha mavu, fami nu fami mbaikhala nu inzo yenji hakhenji. Muthu wagasue mbawukita mudimo wanuhana gusuanguluga gua matshidia.​—Yeshaya 65:21-23.

Guhuima mu gifutshi giagasue. Athu mbashigo mudiluisa nunji mbagafuigo gu itumba. Mbimbi ya Nzambi idi muzuela egi: “[Nzambi] udi musugisa ita yagasue ha mavu.”​—Ngimbo 46:9, 10.

Muila wabonga sha. Bibila didi mutuhua laji egi: “Gushigo nu muthu mungoshi [mba] ukhala mu [Phaladisu] mbawukumuna egi: ‘Ngudi muvua misongo.’” (Yeshaya 33:24) Gima giko gidi egi, muthu ata mungoshi mbagakhadi gikata ndo nga gifua meso nga gifua matshui nga gatabu.​—Yeshaya 35:5, 6.

Guhua gua malamba, gudila, nu gufua. Mbimbi ya Nzambi idi muzuela egi: “Gufua mbagukhalago luko. Madilo gashigo mukhala luko nga mitataganyi nga gubala, ndaga ya ndaga jia gudiangela jiahua.”​—Yatuwuwe 21:4.

Athu abola mbamufua. Yehowa umutendelela egi: “Athu abola . . . mbawakatula mu mavu; atshitshi a ndaga jiabola mbavujiwa gifua mudi muvujiwa ivunza mu mavu.”​—Ishima 2:22.

Athu mbadizumba nunji mbadijitisa. Gualeha ndo gubola mbagukhadi luko ndo, guhua akwetu dilamba, gukuya nu gumenga. Athu mbaakhala hama hamoshi nunji mbaajinga mu gudivuisa nu mikhuala ya Nzambi.​—Yeshaya 26:9.