Longi dia 6
Phaladisu Didi Hehi!
Ima yabola idi mutshitiwa luenyelu holu dia mavu idi mudijiga egi Phaladisu didi hehi. Bibila diazuelele egi mbatujinga mu ilumbu ya phashi gutuama Phaladisu dize. Tudi mujinga ilumbu yene luenyelu! Ima iko yazuelele Bibila egi mba ibwa inyiyi:
Ita yakoma. “Gifutshi giko mbagiluisa giko, ufumu uko mbawuluisa ufumu uko.” (Matayo 24:7) Ndaga ii yadiangele guzwela Bibila yamwenega egi idi yadiago. Sendesa mu givo gia 1914, athu alwile gale ita iyadi ya gifutshi giagasue nu tuita tuko tuavula. Inunu yavula y’athu yanufua mukatshi dia ita yene.
Gudimuanga gua misongo. “Misongo yabala mbayikhala khanda nu khanda.” (Luka 21:11) Ndaga yiyi idi yagiamatshidia ba? Eya. Kansele, misongo ya mutshima, gikuama, maladiya, SIDA, nu misongo iko yanushiya athu avula sha.
Gukonda gua ima ya gudia. Mu mavu agasue, gudi nu athu anula guheta ndo gabuta gaima ya gudia. Inunu yavula y’athu yanufua givo nu givo mukunda nu nzala. Gigi gidi gidimbu giko gimudijiga egi Phaladisu didi hehi nuguza haha. Bibila didi muzuela egi: “Nzala yabala mbayikhala.”—Mako 13:8.
Gudigita gua mavu. “Mavu mbaadigita . . . gu khanda nu gu khanda.” (Matayo 24:7) Ndaga ii nji tanoyimona mu ilumbu yetu. Sendesa mu givo 1914, athu gubalega miliyo imoshi afuilegale mu gudigita gua mavu.
Athu abola. Athu mbaakhala “azumba mbongo” nu “aditanga ene hakhawo.” Mbaakhala “azumbi a gusuanguluga gua ha mavu uvi guzumba Nzambi ndo.” Ana “mbalumbugiila nvuaji jiawo.” (2 Timote 3:1-5) Eye ushi mutaya ndo egi athu amutshindo uu adi gwene mangino ba? Eshi nu lujitu mukunda nu Nzambi go, nunji anusagisa athu adi mutshigina gumega gulonguga ndaga jimutala Nzambi.
Gushiya athu ako. “Gubola mbagudivudisa”. (Matayo 24:12) Muho ungoshi, wajiya gutshigina egi gubola guabalegela mutshindo guakhalele mu ivo yagumatuama. Mu thotho jiagasue athu adi nu woma wagukuiiwa, wagudimbiwa nga wagutshitshiwa gubola.
Ndaga jiji jiagasue jimudijiga egi Ufumu wa Nzambi udi hehi. Bibila dimuzuela egi: “Ngenyi nji hamudi mumona ndaga eji muza, mujiye etshi Ufumu wa Nzambi udi hehi.” (Luka 21:31) Ufumu wa Nzambi udi tshi? Udi uhinyinyi wa Nzambi wa mudilu wunyi mbaubata Phaladisu haha ha mavu. Ufumu wa Nzambi mbauyinga ifumu y’athu.—Danyele 2:44.