Longi dia 7
Ndaga Ya Balegele Mu Tangua Dikulu Idi Gutukebisa
Yehowa mba gashimubemba go egi athu abola abolese Phaladisu. Khuta mafuta enji mbaajinga muene. Itshi mba ibuila athu abola? Ha guzula mvutu, vwa lumene luagiamatshidia lua Nowa. Inunu ya ivo yavula yabalega gale sendesa kumbi diajingile Nowa. Wakhalele muthu wabonga mutshima. Wakhalele mukolesela tangua diagasue hagutshita luzolo lua Yehowa. Uvi athu ako hamavu akhalele mutshita ima yabola. Hene Yehowa wawambelele Nowa egi mbaunogesa mvula ya bala mukunda nu gushiya athu agasue abola. Walezele Nowa egi atunge masuwa angine nu fami yenji ngenyi ale gufua ndo kumbi mbadinoga Mvula ya Bala.—Gisendeselo 6:9-18.
Nowa nu fami yenji atungile masuwa. Nowa wakebishile athu egi Mvula ya Bala mbaimunoga, uvi amuvile ndo. Alandudile gutshita ima yabola. Hadile amanesela gutunga masuwa, Nowa wanginyishile mbiji mukatshi dia masuwa, muene nu fami yenji nji anginyile mukatshi. Hanyima, Yehowa wanogesele gikudi giabala. Mvula yene yanogele ilumbu 40 nu phipha 40. Meya azalele holudia mavu agasue.—Gisendeselo 7:7-12.
Athu abola atotesele monyo wawo, uvi Nowa nu fami yenji a hulugile. Yehowa waabambele kumbi diagasue dianogele mvula ya bala uu nu waazolele holu dia mavu amoshi eshi gubola. (Gisendeselo 7:22, 23) Bibila dimuzuela egi mu tangua dimuza Yehowa mbaumushiya luko athu amutuna gutshita ndaga jia bonga. Athu abonga mbaashigo mushiiwa. Mbaajinga ivo nu ivo hamavu wawa mbaabalumuga Phaladisu.—2 Phetelo 2:5, 6, 9.
Mangino, athu avula amutshita ima yabola. Gifutshi gidi giazala mavuanga. Yehowa wanutuma Mathemua enji mbala jiavula ha gukebisa athu, uvi athu avula anutuna gawo haguvua mbimbi ya Yehowa. Anutshigina go gubalumuna makhalegelo awo. Anutshigina go gutaya ndaga jidi muzuela Nzambi mukunda nu gubonga nu gubola. Itshi mba ibuila athu wawa? Mbaabalumuna mitshima yawo gilumbu giko ba? Athu avula mbaashi mubalumuna mitshima ndo. Gudi nu tangua athu abola mbaashiiwa nunji mbaashi mujinga luko ndo.—Ngimbo 92:7.
Uvi mavu mbaashi mufuago; mbaabalumuiwa phaladisu. Athu adi mubwa mafuta a Nzambi mbaajinga ivo nu ivo holu dia Phaladisu ya hamavu.—Ngimbo 37:29.