Longi dia 8

Akwatshi Adi Mbenyi Jia Nzambi?

Satana Diabulu udi mbenyi ya koma ya Nzambi. Udi givule ginyi gialumbugile gudi Yehowa. Satana wanulandula guluisa Nzambi nu guhua athu dilamba diavula. Satana udi muthu wabola sha. Udi muenya mambo nunji mushiyi w’athu.​—Yone 8:44.

Ivule iko yahatele Satana hagulumbuga gudi Nzambi. Bibila dianuatamega egi ndele. Gifua Satana, ndele jiakhala mbenyi jia athu. Jianutshigina gumuenesa athu phashi. (Matayo 9:32, 33; 12:22) Yehowa mba umushiya Satana nu ivule yenji mailago. Kumbi diawo dia gumonesa athu dilamba diabega diazonda sha.​—Yatuwuwe 12:12.

Gula watshigina gukhala futa dia Nzambi, wajiilego gutshita ndaga jimutshigina Satana egi utshite. Satana nu ndele jienji anumenga Yehowa. Adi mbenyi jia Nzambi, nunji amutshigina gugubuisa mbenyi ya Nzambi. Udi naye guphona nanyi watshigina gusuanguluisa​—Satana nga Yehowa. Gula watshigina guzula monyo wa ivo nu ivo, udi naye guphona hagutshita luzolo lua Nzambi. Satana udi nu miheto nu njila jiavula jia gudimbila athu. Athu avula sha anomuhata.​—Yatuwuwe 12:9.