Luholo lutshi wajiya gusuena hehi nu Nzambi?

1. Nzambi wanavua gutoga guagasue ba?

Nzambi udi mutamega athu a mu yifutshi yagasue ha gusuena gudi muene mu njila ya gumutoga. (Lungimbo 65:2) Uvi, anavuago, yakotelesa egi anatshiginago gutoga guagasue. Ha gutala, yala wanamonesa mukaji ’enji lamba, gutoga guenji guajiyilego gubalega. (1 Phetelo 3:7) Enji, tangua ana Yisalele ahatele gukalagala gubola, Nzambi watunyile gutegelela gutoga guawo. Tudi naye gujiya egi gutoga gudi luendu lua koma. Uvi, Nzambi wanategelela gutoga gua athu a masumu akoma gula abalumuna mitshima.​—Tanga Yeshaya 1:15; 55:7.

2. Luholo lutshi tuajiya gutoga?

Gutoga gudi gukombelela; hene, tudi naye gutoga phamba Yehowa, Mufugi wetu. (Matayo 4:10; 6:9) Luko, luholo tudi athu ashigo agutagana, tudi naye gutoga mu jina dia Yesu wafuile mukunda nu masumu etu. (Yone 14:6) Yehowa anatshigana ndo egi tukuate gutoga mu woongo nga guisonega ha iji dia mukanda. Wanatshigina egi gutoga guetu gukatuge gu mutshima.​—Tanga Matayo 6:7; Filiphi 4:6, 7.

Mufugi wetu wanavua ata gutoga gua mugimume. (1 Samuele 1:12, 13) Udi gututamega ha gumutoga tangua diagasue, gifua mugimenegena, mu ngueze, mu tangua dia gudia, nga tangua dia lamba.​—Tanga Lungimbo 55:22; Matayo 15:36.

3. Mukunda natshi aklisto anagudibungisa?

Ishigo ndaga ya leba ha gusetuga gua Nzambi, mukunda tudi mujinga nu athu anakhala go nu gutshigina gua Nzambi enji analelula malaji ’enji ha gusha guhuima ha mavu. (2 Timote 3:1, 4; 2 Phetelo 3:3, 13) Hene, tudi nu funu ya gudibungisa nu athu tuanakombelela nawo ha gudikolesa.​—Tanga Hebelu 10:24, 25.

Gudibungisa nu athu anuzumba Nzambi guanugutukuatesa ha gumusuena. Gudibungisa gua Mathemu’a Yehowa gudi matangua abonga ha gudikolesa mu gutshigina gua athu ako.​—Tanga Loma 1:11, 12.

4. Luholo lutshi wajiya gusuena hehi nu Nzambi?

Wajiya gusuena hehi nu Yehowa gula udi mutangiza muavula ndaga walonguga mu Mbimbi yenji. Tangiza makalegelo, malongo nu malaji enji. Gutoga nu gutangiza muavula guana gutukuatesa ha gumona gukoma gua kuzumba nu gutema gua Nzambi.​—Tanga Yoshua 1:8; Lungimbo 1:1-3.

Wajiya gusuena gua Nzambi gula udi gumushila mutshima, enji wamutshigina. Uvi, gutshigina gudi gifa mutshi umulomba guudisa. Udi naye gudisa gutshigina guaye tangua diagasue ha gutalela ikuma wanatshiginyila ndaga jiene.​—Tanga Matayo 4:4; Hebelu 11:1, 6.

5. Itshi mba uheta ha gusuena hehi nu Nzambi?

Yehowa wanatangiza athu anagumuzumba. Wajiya guabamba mu gingonza giagasue giajiya gubolesa gutshigina guawo enji felela diawo dia monyo wa ivuo nu ivuo. (Lungimbo 91:1, 2, 7-10) Udi gututemesa mu khalelo dia monyo diajiya guzangela muila nu gusuanguluga guetu. Yehowa wanagutulonga luholo lua bonga lua gujinga.​—Tanga Lungimbo 73:27, 28; Yakoba 4:4, 8.