Gisuegi Tuasuanguluga Gujiya

Gudi nu muthu wagulezele gale gisuegi gimoshi ba?—a Biblia yazuelela gisuegi gimoshi giandando giatambegewa egi “gisuegi gia gijila.” Gidi gijila handaka giakatuga gua Nzambi. Giatambegewa egi gisuegi handaka athu agijiyileko hathomo. Nga baanjelu akambele gugijiya muabonga. Watshigina gujiya gisuegi giene ba?—

Ivo yavula gubalega, Nzambi wafugile yala nu mukhetu wathomo. Majina awo akhadile Adama nu Eva. Nzambi waahagele mu fundo diabonga, jina dia fundo diene dihia dia Edene. Gila Adama nu Eva atumagele Nzambi, ene nu an’awo nga abuishile mavu agasue phaladiso gula Edene. Akhadile naye gukhala mu phaladiso ivo nu ivo. Udi guwunguluga (kuyabuluka) luko mulonga Adama nu Eva akalegele ba?—

Adama nu Eva atumageleko Nzambi ndo, hene mangino tushiko mu phaladiso ndo. Uvi Nzambi wazuela egi, mba ulondeka mavu agasue; muthu wagasue mba ukhala nu monyo wa gusuanguluga ivo nu ivo. Luholo lutshi mba ayikalakala? Ivo yavula gungima, athu ayijiyileko gisuegi giene ndo.

Tangua Yesu ajile hamavu, walongesele athu milonga yavula yatadila gisuegi giene. Wazuelele egi gisuegi giene giatadila Ufumu wa Nzambi. Yesu walezele athu egi akombelele mukunda nu guza gua Ufumu wene. Mba ubalumuna mavu agasue phaladiso.

Wasuanguluga gujiya gisuegi giene ba?— Jiya egi phamba athu ana gutumagela Yehowa mba akhala mu phaladiso. Biblia yatutela mene jia mala nu akhetu atumagele Yehowa. Watshigina guajiya ba?— Tuzuelele athu ene nu luholo tuajiya guateta.