Yelemiya Abembeleko Guzuelela Milonga ya Yehowa Ndo

Tangua diko athu ajiya gutulela nga gutuvila khabu tangua tuana gualongesa mbimbi ya Yehowa. Yajiya gututuma hagubemba guzuelela milonga ya Nzambi. Wadivile gale luholo luene ba?— Mu Biblia mudi lumene lua muvuala mumoshi wazumbile Yehowa, uvi tangua diko wazudile desizio ya gubemba gumuzuelela. Jina dia muvuala muene Yelemiya. Tute lumene luenji.

Tangua Yelemiya akhadile muvuala, Yehowa wamutumine aleze enya Isalele egi abembe gubola. Mudimo wene wakhadile wakola gudi Yelemiya, wamuhuile woma. Wawambelele Yehowa egi: ‘Ngushiko mujiya ndaga ya guzuela ndo. Handaga ngudi mun’a galenge.’ Uvi Yehowa wamuwambele egi: ‘Uviko woma. Mba ngugukuatesa.’

Yelemiya wasendesele guleza enya Isalele egi gula abembeleko khadilo diabola, mba ahuiwa ndola. Watangiza egi akalegele luholo Yelemiya azuelele ba?— Ndo. Amuvidile khabu jiakola, ako akhadile gumulela. Ako adivishile hagumushiya! Watangiza egi Yelemiya wadivile luholo lutshi?— Wavile woma. Wazuelele egi: ‘Mba ngushiko luko guzuelela mbimbi ya Yehowa ndo.’ Uvi wabembele lume gumuzuelela ba?— Ndo, abembele ndo. Wakhadile guzumba Yehowa muavula, hene amoneleko luholo lua gubemba gumuzuelela. Yehowa wamubambele, handaga Yelemiya abembeleko gumuzuelela.

Lusugu luko, athu amitshima yabola amusononele mu wina waleha wazala ithotho. Yelemiya akhaleleko nu meya nga ima ya gudia. Athu ene atshiginyile gumubemba mu wina diene hagula afile muene. Uvi Yehowa wamukuatesele, hene azolewe!

Lumene lua Yelemiya luajiya gugulongesa itshi?— Yelemiya wakhadile guvua woma tangua diko uvi abembeleko guzuelela milonga ya Yehowa ndo. Tangua udi muzuelela milonga ya Yehowa athu ajiya gugulela nga guguhana khabu. Yajiya gugusagesa nga guguhana woma. Uvi, ubembiko guzuela milonga ya Yehowa. Mba ugukuatesa tangua diagasue luholo akuatesele Yelemiya.