Luholo Lua Gukalegela Falanga

Mukut’etu agasue tuana gukhala nu funu ya falanga hagukuatesa fami jietu. (Ishima 30:8) Tuana gujiya egi ‘mbongo jianahana guhuima.’ (Mulongeshi 7:12) Yajiya kukhala lamba egi yala nu mukhetu azuelele mulonga wa falanga, uvi kalagalenu ngolo egi falanga jimibatelako gudinana mu ulo wenu. (Efeso 4:32) Yala nu mukhetu adi naye gudishila mutshima tangua adi muzuelela luholo lua gukalegela falanga.

1 DILONDEGENU MUABONGA

BIBLIA YA ZUELA EGI: “Nanyi mukatshi dienu gula watshigina gutunga inzo yaleha, gashigo mudianga gukhala hashi ha gutanga ndando ha gujiya nga udi nu mbongo yatagana, ha guyimanesela nga ndo?” (Luka 14:28) Mudi naye thomo gudilondega muyadi’enu hagujiya luholo lua gukalegela falanga. (Amosa 3:3) Divisenu mutale gima muajiya gusumba nu ndando yagio. (Ishima 31:16) Gukhala nu falangu guakoteleselego egi mudi naye gusummba gima giagasue gidi musumbishiwa. Lengenu mikudi. Kadikilenu phamba falanga mudi najio.​—Ishima 21:5; 22:7.

GIMA WAJIYA GUKALAGALA:

• Gila guamisala falanga gu suga ya ngonda (mbeji) divenu luholo muajiya gujikalegela

• Gila mua monaegi falanga jienu jiabulumuga, dilondegenu hagubulumuna badepanse enu. Muajiya gutelega ima yenu ya gudia hafundo dia guya mudia mu barestora

2 ZUELENU NU MATSHIDIA

BIBLIA YA ZUELA EGI: “Ndaga . . . tudi mudifuelela gutshita idi ha nduedi, ishigo khuta gu meso a Fumu, uvi nu gu meso a athu nji.” (2 Kolinto 8:21) Leza diago mulumi’aye nga mukaji’aye falanga wana guheta nu jinyi wana guzola.

Gila watshigina guzula madesizio a ndando a tadila falanga, divenu thomo nu mulumi’aye nga mukaji’aye. (Ishima 13:10) Gudivisa muabonga luholo luagukalegela falanga, guajiya gumikuatesa hagukhala nu guhuima mu ulo wenu. Jiya egi falanga wana guheta jishiko phamba jiaye, uvi jia fami yagasue.​—1 Timote 5:8.

GIMA WAJIYA GUKALAGALA:

• Divisenu hagujiya guvula guafalanga muthu nu muthu wajiya guzola gula udi hakhenji

• Munengenenago egi mulonga uzoge hagula muzuelele falanga