Yesu udi Mulongesa Mukhetu wa gu Samaliya

Hakatugile Yesu nu alandudi enji gu Yudea ha guya gu Galile, abalegele gu khanda ya nordi ya distrike dia Samaliya. Ahuidile muavula lusugu luene. Mu tangua dia midi, amagenele hehi nu dimbo dia Sishale, gu wina dia meya ha guhuluguga. Yajiya gukhala egi Yakobo wahagele wina diene, ngando wahanele athu mbongo ha gudihaga ivo yavula yabalega gale. Mangino, tuajiya gumona wina diene hehi nu dimbo dia Naplouse, gu Palestine.

Tangua Yesu wakhalele muhuluguga hehi nu wina dia meya, alandudi enji ayile gu dimbo diakhalele hehi ha gusumba ima ya gudia. Gungima diawo, mukhetu mumoshi wa gu Samaliya wajile ha guthaha meya. Yesu wamulezele egi: “Nguhane meya a gunua.”—Yone 4:7.

Sendese mualeha, enya Yuda nu enya Samaliya akhalelego gudivua nga hazonda. Hene mukhetu muene wayitugile, enji wahudile Yesu egi: ‘Mukunda natshi aye muenya Yuda udi mungutoga ame mukhetu wa gu Samaliya meya a gunua?’ Yesu wa muwambelele egi: ‘Nga wajiyile kado kana guhana Nzambi nu muthu udi guguwambela egi ‘nguhane meya a gunua,’ nga aye wamutogi nawo, enji muene nga waguhanyi meya a monyo.’ Mukhetu wazuelele egi: ‘Fumu, aye ushigo nu kantine ga gubutshila meya, wina nji udi waleha. Gui wajiya guheta meya a monyo? Khakh’etu Yakobo watuhuile wina owu, wamubalega gukoma ba? Muene nu an’enji a mala, nu shitu jienji anuine meya a wina edi.’—Yone 4:9-12.

Yesu wamuwambelele egi: ‘Muthu wagasue wanua meya awa mbawuvua luko luhungu. Uvi, muthu wagasue wanua meya awa mbangumuhana, mbagavuigo luko luhungu nga hazonda, handaga meya mbangumuhana mbaabua muzenji wa meya adi muzoga mukatshi dienji ha guhana monyo wa ivo nu ivo.’ (Yone 4:13, 14) Yadiago, ngatshima Yesu wakhalele waguhuila, watshiginyile gulongesa mukhetu wa gu Samaliya mbimbi jia giamatshidia jidi muhana monyo.

Hene, mukhetu muene wazuelele egi: ‘Fumu, nguhane meya ene, hagula ngukhadigo luko nu luhungu, nu ngukhadigo muza luko ha fundo edi ha guthaha meya.’ Gungima, yamuenegene gifua Yesu udi mutshigina gusombegesa lumene; wazuelele egi: ‘Nda utamege mulumi’aye, vutuga luko haha.’ Mukhetu wazuelele egi: “Ngushigo nu yala.” Uvi, mukhetu muene wadihudile diago tangua Yesu wamudijigile egi: “Wazuela giamatshidia luholo wazuela egi ‘Ngushigo nu yala,’ handaga aye wakhalele gale nu mala mutano. Yala udi nenji henyaha gashigo mulumi’aye.”—Yone 4:15-18, NW.

Ndaga jiazuelele Yesu jiakhalele jia giamatshidia, hene mukhetu muene wadihudile, enji wazuelele egi: ‘Fumu, Ngamona diago egi aye udi profete.’ Gungima, wamonesele egi wakhalele muzumba ndaga jia mu nyuma. Luholo lutshi? Wazuelele egi: ‘Akhakh’etu [enya Samaliya] akombelele Nzambi ha mulundu owu [Mulundu wa Gerizime, unu wakhalele hehi nu Sishale], uvi enue [enya Yuda] muana zuela egi khuta gu Yelusalema athu adi naye gukombelela Nzambi.’—Yone 4:19, 20.

Uvi, Yesu wamuwambelele egi fundo dia gukombelela ishigo diene didi nu ndando. Wazuelele egi: ‘Kumbi didi muza edi mbamushigo mukombelela Tata nga ha mulundu owu, nga gu Yelusalema.’ Gungima, wamudijigile egi: ‘Kumbi didi muza, enji luenyelu, akombeledi a giamatshidia mbaakombelela Tata mu nyuma nu mu giamatshidia, handaga Tata wana gukamba diago athu a luholo elu ha gumukombelela.’—Yone 4:21, 23, 24.

Ndaga yana gukamba Tata gudi akombeledi enji a giamatshidia ishigo fundo adi naye ene gumukombelela, uvi luholo adi naye gumukombelela. Mukhetu munu wadihudile diago. Wazuelele egi: ‘Ngudi mujiya egi Masiya, wana gutamegewa egi Klisto, mbawuza. Tangua mbadiza muene, mbawutuwambela ndaga jiagasue haphelo.’—Yone 4:25.

Hene, Yesu wamuwambelele ndaga imoshi ya funu egi: “Ame ngudi muzuela naye, ngudi muene.” (Yone 4:26) Tangiza gale! Mukhetu owu wajile ha guthaha meya mu midi. Uvi, Yesu wamuhanele lutumbu tangua wamuwambelele ndaga yakhalele khenji gawambela gale athu ako haphelo. Wamuwambelele egi udi Masiya.

ENYA SAMALIYA AVULA ASHILE GUTSHIGINA

Alandudi a Yesu akatugile gu dimbo dia Sishale nu ima ya gudia. Asangele Yesu ha fundo amubembele, ha wima dia meya dia Yakobo udi muta maga nu mukhetu wa Samaliya. Hahetele alandudi, mukhetu muene wabembele dibungu dienji dia guthahela meya, enji wayile guembo.

Tangua gahetele gu Sishale, wawambelele athu ndaga jiamudijigile Yesu. Wawambelele nu gutshigina guagasue egi: ‘Izenu mumone yala mumoshi wanguwambela ndaga jiagasue jingatshitshile.’ Gungima, tangua diko ha guhana athu ene nzala ya gujiya ndaga jiko, waahudile egi: “Muene wajiya gukhala Klisto ba?” (Yone 4:29) Muhu owu udi muhu umoshi wa ndando yavula—athu ana guwushila matangi sendese mu tangua dia Moise. (Mikhuala 18:18) Ndaga yene yatumine athu a gu Sishale ha guzoga muza mutala Yesu ene hakhawo.

Mu tuangua diene, alandudi akhalele mububila Yesu ha gudia ima amubatele. Uvi muene waavutudile egi: ‘Ngudi nu ima ya gudia imushigo mujiya.’ Alandudi adihudile egi: ‘Gudi nu muthu wamubatela ima ya gudia ba?’ Yesu waadijigile ndaga mbayikuatesa alandudi enji agasue. Wazuelele egi: ‘Ima yami ya gudia idi gukalagala gutshigina gua muthu wangutumine nu gumanesela mudimo wenji.’—Yone 4:32-34.

Mudimo wakhalele muzuelela Yesu ushigo mudimo wa gukatula mabundu, owu wakhalele mutshigina gusendesa gungima dia mbeji nguana. Yesu wakhalele muzuelela mudimo wa gukatula mabundu mu nyuma, handaga gungima wazuelele egi: “Zumbudienu meso mutale mu mahia, mbuto jiakodi gale ha gumuna. Mumunyi udi muzangula gishimbigo, enji udi mubungisa mbuto mukunda nu monyo wa ivo nu ivo. Ngenyi, mukunyi nu mumunyi adi musuanguluga hamoshi.”—Yone 4:35, 36.

Yajiya gukhala egi Yesu wamonele gubonga mbaguheta athu ako mukunda nu maga gatele nu mukhetu wa gu Samaliya. Athu avula a mu dimbo dia Sishale ahagele gutshigina guawo gudi Yesu mukunda nu ndaga jiaawambelele mukhetu wa gu Samaliya, handaga mukhetu muene waadijigile egi: ‘Wanguwambela ndaga jiagasue eji ngatshitshile gale.’ (Yone 4:39) Hene, tangua enya mu dimbo dia Sishale ayile gu wina dia meya, atogele Yesu ha guya gumbo diawo hagula a alongese ndaga jiavula. Yesu watshiginyile, enji wabalegesele masugu mbadi mu dimbo dia Samaliya.

Enya Samaliya ategelele ndaga jiaalongesele Yesu, enji avula mukatshi diawo ashile gutshigina guawo gudi muene. Hene, adijigile mukhetu muene egi: ‘Tuashilego gutshigina guetu gudi muene phamba mukunda nu ndaga watudijigile, uvi tuamutshigina handaga esue hakhetu tuadivuila, nu tuajiya egi muene udi diago muhuluishi wa ha mavu.’ (Yone 4:42) Yadiago, mukhetu wa gu Samaliya udi gifezegeselo giabonga mu ndaga yatadila guwambela athu ako malongo a Klisto; tudi naye guhana athu adi gututegelela nzala hagula akambe gujiya ndaga jiko jiavula.

Jiya egi ndaga yene ya kalegewe mbeji nguana gutuama egi sungi ya gukatula mabundu isendese. Idi mumonega egi yakhalele sungi ya gukatula mabundu a orge, mu sungi ya printemps. Mu tangua diene, yajiya gukhala mu mbeji ya Novembre nga Decembre. Yakotelesa egi gungima dia Pake ya givo 30 gia tangua dietu, Yesu nu alandudi enji abalegesele mbeji nage mu Yudea, akhalele mulongesa nu gubatiza athu. Gungima, ayile gu khanda ya nordi gumbo diawo, gu Galile. Ndaga itshi yakhalele guaanengena guene?