Yesu Watamega Matayo

Tangua dia zonda gungima dia gusaga muenya khonzo, Yesu wasalele mu dimbo dia Kaphelenauma, hehi nu Kianga gia Galile. Mu tangua diene, athu avula ayile luko gudi muene, enji wasendesele guaalongesa. Hakhalele muene muwenda, wamuenene Matayo, wana gutamegewa luko egi Levi. Matayo wakhalele mu biro dienji dia gufutshisa gitadi. Yesu wamutamegele, wamudijigile egi: ‘Ngulandule.’—Matayo 9:9.

Luholo lumoshi nu Phetelo, Andre, Yakoba, nu Yone, yajiya gukhala egi Matayo wakhalele wavi gale malongo a Yesu nu ndaga jia gushimana jia kalegele muene mu dimbo diawo. Luholo lumoshi nu ene, Matayo walanduile Yesu giphungu gimoshi. Muene hakhenji wasonegele ndaga yene mu Evanjile yenji egi: ‘Mu tangua dinyi, muene [Matayo hakhenji] wazugile nu walanduile’ Yesu. (Matayo 9:9) Hene, Matayo wabembele inemo yakhalele nayo ya gufutshisa gitadi, enji wabuile mulandudi wa Yesu.

Yajiya gukhala egi lusugu lumoshi, Matayo wakalegele wano wakoma gumbo dienji ha gumonesa diago egi wasuangulugile luholo Yesu wamutamegele. Watamegele Yesu nu alandudi enji. Uvi akuatshi atamegewe luko? Watamegele nji mafut’enji akhalele mukalagala nawo mudimo wa gufutshisa gitadi. Akhalele mufutshisa gitadi mukunda nu mafumu a enya Roma, anyi athu akhalelego muzumba. Akhalele mufutshisa gitadi gia masuwa akhalele mumagana ha mbungu, gitadi gia athu akhalele muwenda mu njila jiakoma nu tubalu, nu gitadi gia ima akhalele musumba mu membo ako. Luholo lutshi enya Yuda akhalele mutadila afutshishi a gitadi? Athu akhalelego muzumba afutshishi a gitadi handaga akhalele mumba mambo, gulezela mbongo holu dia mbongo eji athu akhalele naye gufuta. Luko, gu wano wene guakhalele nu ‘enya gubola’, anyi akhalele mujiyiwa gifua akalagadi a ndaga jiabola.—Luka 7:37-39.

Afalese akhalele gudimona gifua athu abonga. Hene, tangua amonele Yesu udi mudia nu athu a luholo elu, ahudile alandudi a Yesu egi: ‘Mukunda natshi mulongeshi wenu udi mudia hamoshi nu afutshishi a gitadi nu enya gubola?’ (Matayo 9:11) Yesu wavuile ndaga ene azuelele, hene waahanele mvutu egi: “Athu adi nu jingolo anago gukamba musagi, phamba athu adi nu misongo. Ndienu, mukambe ha gukotelesa mbimbi eji: ‘Ngatshigina guvuila athu khenda, uvi shitu jia milambu ndo.’ Handaga ngajilego ha gutamega athu adi abonga gu meso a Nzambi, uvi ngajile ha gutamega enya gubola.” (Matayo 9:12, 13; Hoshea 6:6, NW) Tangua Afalese atamegele Yesu egi “mulongeshi,” yakhalelego gutamega gua giamatshidia. Ikhale ngenyi, muene waalongesele luholo lua gukhala muthu wabonga.

Idi mumonega egi Matayo watamegele afutshishi a gitadi nu enya gubola ha guza gumbo dienji hagula ategelele Yesu nu a asage mu nyuma, ‘handaga athu avula a luholo elu akhalele gumulandula.’ (Mako 2:15) Yesu wakhalele mutshigina guaakuatesa ha gukuata ufuta wabonga nu Nzambi. Yesu gakhalelego gifua Afalese handaga ene akhalele gudimona gifua athu abonga, enji akhalelego muzumba athu a luholo elu. Uvi Yesu wakhalele muzumba athu agasue. Muene wakhalele nu khenda jiavula diago. Wakalegele gifua musagi wa mu nyuma mukunda nu athu agasue akhalele mukata mu nyuma.

Yesu wavidile afutshishi a gitadi nu enya gubola khenda. Uvi, ishigo mukotelesa egi gamonelego gubola guawo. Waavidile khenda gifua luholo gavidile athu akhalele nu misongo. Wunguluga ndaga gawambelele muenya misongo ya hute tangua gamukuatele nu khenda jiagasue egi: ‘Ngatshigina! Weluga.’ (Matayo 8:3) Tudi naye gumonesa diago khadilo edi dia khenda nu gukuatesa athu adi nu funu ya ukuateshi. Tudi naye guaakuatesa muavula mu nyuma.