‘Khenji Guazuelele Galego nga Muthu Gifua Mudi Muzuela Muthu Yowu’

Yesu wakhalele yowu genji gu Yelusalema mukunda nu Wano wa Isasa. Wasuangulugile handaga ‘athu avula amonesele gutshigina gudi muene.’ Uvi, mafumu a mangumba asuangulugilego. Atumine masuta hagula aye amukuate. (Yone 7:31, 32) Uvi, Yesu gadisuegelego.

Hafundo dia gubemba, Yesu walandudile gulongesa mu mafundo a athu avula gu Yelusalema, wazuelele egi: ‘Ngudi mukhala n’enu khuta tangua diazonda, hangima ngudi muya gudi muthu wangutumine. Mbamungukamba, uvi mbamungumonyigo, handaga muajiyilego guheta guma mbanguya ame.’ (Yone 7:33, 34) Enya Yuda akhalelego mukotelesa, hene asendesele gudizuelela hakhawo egi: “Muthu yowu mbawuya gui hagula mbatumumonyigo? Muene mbawuya gudi enya Yuda amuangenene mukatshi dia enya Greki ha gulongesa enya Greki ba? Udi mutshigina guzuela itshi hadi muene muzuela egi: ‘Mbamungukamba, uvi mbamungumonyigo guma mbanguya ame’?” (Yone 7:35, 36, NW) Yesu wakhalele muzuelela gufua guenji nu gufuzumuga guenji ha guya mu dilu, fundo mbalagaji jienji jiajiyilego gumulandula.

Lusugu lua sambadi lua wano luataganele. Gimenegena gia lusugu luagasue lua wano, nganga-nzambi wakhalele mubundula meya akhalele muthayewa mu gijiba gia Siloe, hagula egi abulumuge goshi’a giwotshielo gia mu tempelo. Ha guwunguluisa athu ndaga yene, Yesu wazuelele mu dijui diakola egi : “Gula muthu udi nu luhungu, aze gudi ame, anue genji meya. Gifua mudi muzuela mukanda wa Nzambi egi: Muthu yago washa gutshigina gudi ame ‘mita ya meya a monyo mbayizoga mu mutshima wenji.’”—Yone 7:37, 38.

Yesu wakhalele muzuelela ndaga yakhalele naye gubua tangua alandudi enji mbaambiwa maji mu nyuma nu mbaatamegewa ha guya mujinga mu dilu. Ndaga yene yataganesewe gungima dia gufua gua Yesu, mu lusugu lua Pantekote ya givo gia landudile. Mita ya meya a monyo yasendesele gubulumuga tangua alandudi ambiwe maji mu nyuma akhalele mulongesa giamatshidia gudi athu.

Athu avuile ndaga jialongesele Yesu azuelele egi: “Giamatshidia muthu yowu udi Ngambi ya Nzambi.” Idi yadiago egi akhalele muzuelela muthu watendelewe egi mbawukhala ngambi wakoma gubalega Moise. Ako azuelele egi: “Yowu udi Klisto.” Uvi ako egi: ‘Klisto wajiya guzoga gu Galile ba? Mukanda wa Nzambi wazuelelego egi Klisto mbawukhala mujigulu’a Davidi nu mbawuzoga gu Beteleheme, dimbo diakhalele mukhala Davidi ba?’—Yone 7:40-42.

Yadiago, athu akhalele nu matangi agudisha. Athu ako akhalele mutshigina egi Yesu akuatewe, uvi gushigo nga muthu mumoshi wasunuine koko ha gumukuata. Tangua masuta avutugile gudi mafumu a mangumba mago a githuhu, mafumu a nganga-nzambi nu Afalese a ahudile egi: ‘Mukunda natshi muajilego n’enji?’ Masuta azuelele egi: ‘Khenji guazuelele galego nga muthu gifua mudi muzuela muthu yowu.’ Mafumu a mangumba avuile khabu, asendesele guzuela ndaga jiabola nu mashingana egi: ‘Nu enue nji muawungishiwa ba? Gushigo nga muthu mumoshi mukatshi dia mafumu nga dia Afalese wamonesa gutshigina gudi muene? Uvi thundu eyi ya athu awa ashigo mujiya Mukhuala adi agutewa mukumbu.’—Yone 7:45-49.

Hene, Nikodemo, Mufalese mumoshi wakhalele mukatshi dia enya gu Sanhédrin, wahetele gikhesa ha guzuela ndaga jiabonga mukunda nu Yesu. Ivo iyadi nu ndambo yabalega, Nikodemo wayile gudi Yesu mu phipha nu wamonesele gutshigina guenji gudi Yesu. Hene, Nikodemo wawambelele Afalese egi: ‘Mukhuala wetu wanafuisago muthu mulonga gula khenji amutegelela galego, nu gula khenji ajiya galego ndaga yatshitshi muene, ishigo ngenyi ba?’ Mvutu itshi ahanele ene? Azuelele egi: “Nu aye nji, udi muenya gu Galile ba? Kamba muabonga, mbawumona egi gushigo nga ngambi ya Nzambi imoshi yazogele mu Galile.”—Yone 7:51, 52.

Mbimbi ya Nzambi yamoneselego diago haphelo egi Profete mbawuzoga gu Galile. Uvi yamonesele egi Klisto mbawuzoga guene. Yazuelele egi “muanya wavula” mbawumonega gu ‘Galile ga ifutshi.’ (Yeshaya 9:1, 2; Matayo 4:13-17) Luko, luholo profesi yazuelele, Yesu wavalewe gu Beteleheme, nu wakhalele mujigulu’a Davidi. Ngatshima yajiya gukhala egi Afalese akhalele mujiya ndaga yene, idi yadiago egi ene akhalele ha gishina gia guwambela athu ndaga jia mambo mukunda nu Yesu.