Gudiangela Gudilonda Guana Gumonesa Gutema

Gifezegeselo giahanele Yesu giatadila mon’a yala watotele, giakhalele naye gukuata mitshima ya afutshishi a gitadi, alongeshi a mikhuala nu Afalese ha gujiya egi Nzambi wana gutotesela athu ana gubalumuna mitshima yawo. (Luka 15:1-7, 11) Uvi haha Yesu wakhalele muwambela alandudi enji. Wahanele gifezegeselo giko giatadila muenya umonyi yonu wavile egi muenya mudimo wenji gakhalelego mutshita mudimo kiawaha.

Yesu wazuelele egi afundile muenya mudimo handaga gakhalelego mukalegela ima ya fumi’enji muabonga. Hene fumi’enji wazuelele egi mbawumukatula gu mudimo. Muene wadihudile egi ‘Ngutshita gutshi handaga fumi’ami udi gungutambula ubambi wenji? Ngushigo nu ngolo jia gudima, ngudi nu musonyi ha gutoga ima gudi athu ako.’ Ha gudiangela gudilondega muabonga wazuelele egi: ‘Ayi, ngajiya ndaga ngajiya gutshita hagula athu mbangutshigine gu jinzo jiawo tangua mbangukatudiwa gu mudimo.’ Watamegele athu akhalele nu mikudi ya fumi’enji, waahudile egi: ‘Udi nu mukudi wa fumi’ami guvula gutshi?’—Luka 16:3-5.

Muthu wathomo wazuelele egi: “Izongelo 100 ya maji.” Yakotelesa egi litre jia maji 2 200. Yajiya gukhala egi muenya mukudi wakhalele nu dihia diakoma dia mabundu a olive, nga ndo wakhalele musumbisa maji. Muenya mudimo muene wamuwambelele egi: “Zula mukanda waye khala hashi gatshididi sonega 50 [yakotelesa egi ba litre a maji 1 100].”—Luka 16:6.

Muenya mudimo muene wahudilele muthu muko egi: ‘Aye udi nu mukudi guvula gutshi?’ Wazuelele egi: “Makuba a ble lukhama.” Yakotelesa ba litre 22 000. Muenya mudimo wamuwambelele egi: ‘Zangula mukanda waye sonega 80.’ Wabulumuine mukudi wenji muavula diago.—Luka 16:7.

Muenya mudimo muene wakhalele khenji gakatudiwa ndo, tuajiya guzuela egi wakhalele nu ufumu wa guzondesa mikudi athu akhalele naye guhana gudi fumi’enji. Luholo muenya mudimo wazondesele mikudi, wakuatele ufuta nu athu ajiya gumukuatesa gula mudimo wenji wafua.

Gungima fumi’a mudimo wavile ndaga yabalegele. Ndaga yene yamutotesele makuta avula, uvi muenya mudimo wamuyitugishile hene fumu wamushimanene. ‘Watshitshile gubola,’ uvi ‘wakalegele ndaga nu gutema.’ Yesu wazuelele luko egi: ‘Ana a mu gindongo egi abalega ana muanya gutema mu jindaga jiawo.’—Luka 16:8.

Yesu wakhalelego musunzula unzangi, nga gusuanguluga nu ba metode a muenya mudimo muene. Uvi watshiginyile diago guzuela ndaga tshi? Wawambelele alandudi egi: ‘Dikuatenu ufuta nu umonyi udi ushigo watagana gu meso a Nzambi handaga lusugu mbawuhua, mafuta ene mbaamitshigina mu mabugu a gukhalela a ivo nu ivo.’ (Luka 16:9) Yadiago, mbimbi eji jidi nu longo diatadila gudiangela gudilondega nu gukalagala ndaga nu gutema. Akombeledi a Nzambi, “ana muanya,” adi naye gukalegela umonyi wawo nu gutema guagasue, ha gutangiza lujingu lua ivo nu ivo mu masugu adi muza.

Phamba Yehowa Nzambi nu Mun’enji ajiya gutshigina egi muthu angine mu Ufumu wa mu dilu nga mu phaladiso ha mavu. Tudi naye gukalegela umonyi tudi nawo ha gukuatesa mudimo wa Ufumu, ngenyi mbatukudisa ufuta nu Yehowa nu Yesu. Gila tuatshita ngenyi, mbatuheta lujingu lua ivo nu ivo tangua wolo, siliva nga umonyi uko mbawubola.

Yesu wazuelele luko egi athu adi mukalegela ima yawo ya gujingila nga umonyi wawo muabonga mbakalegela nji muabonga ima idi yabalega ndando. Hene, Yesu wazuelele egi, ‘gula mushigo nu gufubidila mu ima ya gituhu ya ha mavu awa, nanyi mbawutshigina gumihana ima idi ya ndando diago [gifua inemo yatadila Ufumu]?’—Luka 16:11.

Yesu wamonesele alandudi enji egi guheta mu “mabugu a gukhalela a ivo nu ivo” gushigo ndaga yaleba ndo. Muthu udi mukombela Nzambi nu mutshima umoshi gajiyilego gukhala luko muhiga wa umonyi ushigo watagana gu meso a Nzambi. Yesu wasugishile egi: ‘Muenya mudimo mungoshi gajiyilego gutshitshila mafumu mbadi mudimo, muene mbawutuna muko uvi mbawuzumba muko. Nga ndo, mbawujinginyina gudi muko uvi muko ndo. Muajiyilego gukhala ahiga a Nzambi nu a umonyi.’—Luka 16:9, 13.