Ufumu wa Nzambi Udi Itshi?

BIBLIA IMUZUELA EGI

“Nzambi wa mu dilu mbawuhaga ufumu umoshi, mbawukhadigo nu gisugishilo.”​—Danyele 2:44, Mukanda wa Nzambi.

“Mon’a yala watuhuwa. Ufumu mbawukhala ha phanga jienji.”​—Yeshaya 9:6, Mukanda wa Nzambi.

NDAGA YAWAHA MUKUNDA NU EYE

• Gudi nu guvernema imoshi yatagana yajiya gugubatela gubonga.​—Yeshaya 48:17, 18.

• Mu mavu ahe-ahe adi muza, mbawukhala nu sante yabonga nu gusuanguluga.​—Gumonesa 21:3, 4.

TUAJIYA DIAGO GUTSHIGINA NDAGA IDI MUZUELA BIBLIA BA?

Ayi, mukunda nu ndaga eji mbadi:

• Yesu wamonesele ndaga Ufumu wa Nzambi mbawukalagala. Yesu walongesele alandudi enji ha gukombelela egi Ufumu wa Nzambi uze nu hagula gutshigina guenji gukalegewe ha mavu. (Matayo 6:9, 10) Yesu wamonesele luholo gukombelela guene mbagutagenesewa.

  Tangua Yesu wakhalele ha mavu, wahanele athu akhalele nu nzala ima yagudia, wasagele enya misongo, wafuzumuine athu a gufua! (Matayo 15:29-38; Yone 11:38-44) Luholo Yesu wakhalele muthu udi naye guhinyina Ufumu wa Nzambi, wamonesele ndaga Ufumu wene mbawukalegela athu.​—Gumonesa 11:15.

• Ndaga jidi mukalegewa ha mavu jidi mumonesa egi gualeha ndo Ufumu wa Nzambi umuza. Yesu wazuelele egi gutuama egi Ufumu wa Nzambi ubate guhuima ha mavu, athu mbaatagana nu malamba, ita, nzala nu gudigita gua mavu.​—Matayo 24:3, 7.

  Tudi mumona ndaga jiene mangino. Hene, tuajiya diago gusha mutshima egi gushigo gualeha ndo, Ufumu wa Nzambi mbawumanesela malamba ene agasue.