MUKHAPHO 12
Luholo Lutshi Wajiya Gubua Futa Dia Nzambi?
1, 2. Tanga majina a athu ako akhadile mafuta a Yehowa?
WJIYA gutomba nanyi egi akhale futa diaye? Udi naye gukhala muthu wana gugusuanguluisa. Mudi naye gudivua n’enji muabonga. Makalegelo enji adi naye gugusuanguluisa.
2 Yehowa wana gutomba athu ako ha guabuisa mafuta enji. Mukatshi dia mafuta ene a Yehowa, tuajiya gutanga Abalahama. (Yeshaya 41:8; Yakoba 2:23) Yehowa wazumbile nji Davidi. Wazuelele egi Davidi udi ‘muthu udi mudituta nu mutshima wami diago.’ (Makalegelo 13:22) Yehowa wakhadile ‘guzumba’ profete Danyele.—Danyele 9:23.
3. Mukunda natshi Abalahama, Davidi, nu Danyele akhadile mafuta a Yehowa?
3 Abalahama, Davidi, nu Danyele akalegele itshi ha gubua mafuta a Yehowa? Yehowa wawambelele Abalahama gamba: “Aye watumagele mbimbi yami.” (Gisendeselo 22:18) Yehowa wana gubua futa dia muthu wagasue wana gumutumagela nu gudibulumuisa guagasue. Yehowa wajiya luko gukuata ufuta nu Athu agasue a gifutshi gimoshi. Yehowa wawambelele enya Isalele egi: “Mutumage mbimbi yami, ngenyi ame mbangukhala Nzambi yenu nu enue mbamukhala athu ami.” (Yelemiya 7:23) Aye nji gila watshigina gubua futa dia Yehowa, udi naye gumutumagela.
YEHOWA WANA GUBAMBA MAFUTA ENJI
4, 5. Luholo lutshi Yehowa wana gubamba mafuta enji?
4 Biblia yazuela egi Yehowa wana “gukuatesa athu adi gumutshigina nu mitshima yawo yagasue.” (2 Gudilanduluila 16:9) Mu mukanda wa Ngimbo 32:8, Yehowa wa laya mafuta enji egi: “Mbangugudijiga njila iwudi nay’o ya gulandula, mbangugulongesa ndaga jiagasue, mbangugutala muabonga.”
5 Mbalagaji mumoshi wa ngolo jiavula wana gutshigina egi tukoke ufuta wetu nu Nzambi. Uvi Yehowa wana gutubamba. (Tanga Ngimbo 55:23.) Luholo tudi mafuta a Yehowa, tuana gumukombelela nu mutshima wetu wagasue. Tudi ya gumujinginyina nga mu matangua a malamba. Esue nji tudi nu felela luholo lumoshi nu muyimbi wa Ngimbo 55:23. Wasonegele mukunda nu Yehowa egi: “Muene udi hehi n’ame, gima gimoshi giajiyilego gungunyigisa.” (Ngimbo 16:8; 63:9) Luholo lutshi Satana ana gukalagala hagula tukoke ufuta wetu nu Nzambi?
NDAGA JIAMAMBO JIAZUELELE SATANA
6. Itshi Satana wazuele mukunda nu athu?
6 Mu Mukhapho 11 tualongugile egi Satana wazuelele gamba Yehowa udi muenya mambo nu muenya ndaga jiabola, handaga ahanelego Adama nu Eva njila ya gudizudila desizio dia gutomba ndaga itshi idi yabonga nga yabola. Mukanda wa Yobo watumonesa egi Satana wana gufunda athu ana gutshigina gubua mafuta a Nzambi. Satana wana guzuela egi athu ana gukombelela Nzambi mukunda nu ima Nzambi wana guahana, ishigo ndo guzumba guana guatuma ha gumukombelela. Satana wazuelele luko egi wajiya gudimba muthu wagasue udi gukombelela Nzambi. Tuzule longo gu lumene lua Yobo nu luholo Yehowa wamubambele.
7, 8. (a) Luholo lutshi Yehowa wadivile mukunda nu Yobo? (b) Itshi Satana wazuelele mukunda nu Yobo?
7 Yobo wakhadile nanyi? Wakhadile muthu mumoshi wabonga, sendese hakhadile muene nu lujingu uu nu mangino ivo hehi nu 3 600 yabalegele gale. Yehowa wazuelele egi mu sungi yene, guakhadilego nu muthu ha mavu gifua Yobo. Yobo wakhadile munemesa Nzambi muavula, enji wakhadilego guzumba ndaga jiabola. (Yobo 1:8) Yobo wakhadile futa dia Yehowa wa mutshima.
8 Satana wazuelele egi Yobo wakhadile mukombelela Nzambi nu matangi abola. Satana wawambelele Yehowa egi: “Aye wanamubamba gu khanda jiagasue gifua muthu udi mubambewa mu giphanga (ga luphango), muene nu a nzo yenji yagasue, nu ima yenji yagasue! Aye wanasuanguluisa gima giagasue gidi muene mutshita. Ivuama iwamuhuile yazala pha ha mavu. Uvi gula wababata koko gu gima giagasue gidi n’agio muene, ngudi muguwambela egi: Yobo mbawuguhuhua mikumbu mu gimona gia meso.”—Yobo 1:10, 11.
9. Yehowa wahanele Satana njila ya gukalagala gima gitshi?
9 Satana wazuelele egi Yobo wana gukombelela Yehowa phamba mukunda nu ima Nzambi wana gumuhana. Satana wazuelele luko egi wajiya gushinjiga Yobo ha gubemba gukombelela Yehowa. Yehowa adivilego nu Satana, uvi wamuhanele njila ya gulola Yobo ha gujiya gila ufuta wa Yobo nu Yehowa udi mukunda wana gumuzumba.
SATANA WALOLA YOBO
10. Luholo lutshi Satana walolele Yobo, itshi Yobo wakalegele?
10 Thomo, Satana washiyile shitu jiagasue jia Yobo. Washiyile luko enya mudimo avula a Yobo. Yobo watotesele ima yenji yagasue. Ha gusugisa, Satana washiyile ana agasue a Yobo gu gikudi. Uvi Yobo wamonesele gujinginyina gudi Yehowa. “Mu malamba anyi agasue, Yobo gatshitshilego nga ndaga imoshi yabola, muene ganyamigishilego Yehowa nu ndaga yabola ndo.”—Yobo 1:12-19, 22.
Yehowa wahanele luko Yobo ivuama mukunda nu gujinginyina guenji
11. (a) Itshi Satana wakalegele luko Yobo? (b) Yobo wakalegele luholo lutshi?
11 Satana gabembelego. Washidile Nzambi giphapha tangua azuelele egi: “Uvi lola gale gubabata muila wenji koko, ngudi muguwambela egi muene mbawuguhuhua mikumbu.” Satana wakatesele Yobo misongo imoshi yabala lume. (Yobo 2:5, 7) Uvi, Yobo wakhalele tangua diagasue wagujinginyina gudi Yehowa, “mu malamba agasue akhadile n’awo Yobo, muene gazuelelego ndaga yabola gudi Nzambi.”—Yobo 2:10.
12. Luholo lutshi Yobo wamonesele egi Satana muenya mambo?
12 Yobo gakhadilego gujiya ndaga Satana wazuelele, nga gishina gia malamba enji. Watangijile egi Yehowa wakhadile gumusagesa. (Yobo 6:4; 16:11-14) Uvi ata ngenyi, Yobo wakhalele wagujinginyina gudi Yehowa. Guakhadilego luko nu ndaga ya gushila giphapha. Yobo gakhadilego mutshima wabola. Wakhadile futa dia Nzambi, mukunda nu guzumba guenji gudi Nzambi. Ndaga jiagasue jiazuelele Satana jiakhadile jia mambo!
13. Gubonga gutshi Yobo wahetele mukunda nu gujinginyina guenji?
13 Yobo gakhadilego gujiya milonga yakhadile gubalega mu dilu, uvi wakhadile wagujinginyina gudi Nzambi, hakiene, wamonesele egi Satana udi muthu wabola. Yehowa wasuanguluishile Yobo mukunda nu gujinginyina guenji.—Yobo 42:12-17.
NDAGA SATANA WANA GUZUELA MUKUNDA NU AYE
14, 15. Ndaga itshi Satana wana guzuela mukunda nu mala nu akhetu agasue?
14 Wajiya guzula malongo a ndando mu lumene lua Yobo. Mangino, Satana wana guzuela egi tuana gukombelela Yehowa mukunda nu ima Yehowa wana gutuhana. Mu mukanda wa Yobo 2:4, Satana wazuelele egi: “Muthu mbawuhana gima giagasue gidi n’agio muene ha guhuluisa monyo wenji.” Zuelelo diene diamonesa egi Satana gazuelelego phamba hamulonga nu Yobo, uvi wana guzuela egi mala nu akhetu agasue akhala nu matangi abola. Ivo yavula gungima dia gufua gua Yobo, Satana wana gushingana Yehowa, wana guzuelela nji ndaga jiamambo mukunda nu akombeledi enji. Mukanda wa Ishima 27:11 wazuela egi: ‘Mun’ami uwende nu gutema, ngenyi mbangukhala nu gusuanguluga. Gula muthu wangufeta [wangushingana], ngajiya gutema gumuhana mvutu.’
15 Wajiya gutomba egi utumagele Yehowa nu ukhale futa Dienji wa gujinginyina, ha gumonesa egi Satana udi muenya mambo. Gila wamona egi udi naye gubalumuna khadilo diaye, ha gubua futa dia Nzambi, jiya egi wazula diago desizio diabonga! Desizio diene didi nu ndando yavula. Satana wana guzuela egi gula malamba agubuila wajiyilego gukhala ya gujinginyina gudi Nzambi. Satana wana lola gutudimba hagula tulumbugile Nzambi. Mu luholo lutshi?
16. (a) Maluholo atshi Satana wana gukalegela ha gula athu atune gukombelela Yehowa? (b) Luholo lutshi Diabulu wajiya gugutuma ha gubemba gukombelela Yehowa?
16 Satana wana gukalegela maluholo avula ha gukoka ufuta wetu nu Nzambi. Udi gukalagala ‘gifua khoshi idi gukaluluga, idi gukamba muthu ha gumudia.’ (1 Phetelo 5:8) Udihudigo gila futa diaye, muenya fami yaye nga athu ako adi gugushinjiga egi ubembe gulonguga guaye gua Biblia nu gukalagala ndaga jiabonga. Wajiya gudivua gifua muthu udi guluishiwa.a (Yone 15:19, 20) Satana wana gudibalumuna “gifua muanjielo wa muanya.” Hene wana gulola gutudimba ha gula tulumbugile Nzambi. (2 Kolinto 11:14) Gudi nu luholo luko Satana wana gukalegela ha gutuhuiga, ha gula tubembe gukombelela Yehowa. Wana gututuma ha gutangiza egi tuataganelego ha gukombelela Nzambi.—Ishima 24:10.
TUMAGELA MIKHUALA YA YEHOWA
17. Mukunda natshi tuana gutumagela Yehowa?
17 Tangua tuana gutumagela Yehowa, tuana gumonesa egi Satana udi muenya mambo. Itshi yajiya gutukuatesa ha gutumagela Nzambi? Biblia yazuela egi: ‘Muzumbe Yehowa, Nzambi wenu nu mitshima yenu yagasue nu mionyo yenu nu jingolo jienu jiagasue.’ (Mikhuala 6:5) Tuana gutumagela Yehowa handaga tuana gumuzumba. Gila tuasendesa guzumba Yehowa muavula, tuajiya gukalagala gima giagasue gidi muene gututoga. Mupostolo Yone wasonegele egi: “Ndaga ya guzumba gua Nzambi gudi ha gubamba mikhuala yenji. Mikhuala yenji ishigo mutukolela.”—1 Yone 5:3.
18, 19. (a) Ndaga jitshi jiko Yehowa watuwambela egi jidi jiabola? (b) Luholo lutshi tuajiya egi Yehowa anako gututoga ndaga jiabalega gukola?
18 Ndaga jitshi jiko Yehowa atuwambela egi jidi jiabola? Tala jiko jia fundjiwa mu galuanda “Tuna Ndaga Jiana Gutuna Yehowa.” Gungima dia gutanga galuanda gene, wajiya gumona gifua ndaga jiko jiatangewa muene jishigo jiabola. Uvi gila watanga verse jia Biblia jidi muene, gungima wajitangiza muabonga, wajiya gukotelesa egi gutumagela mikhuala ya Yehowa gudi gima giabonga. Wajiya nji gumona egi udi naye gubalumuna makalegelo ako mu lujingu luaye. Tangua diko yajiya gukhala lamba ha gubalumuna makalegelo aye, uvi jiya egi gila waabalumuna, mbawubua futa dia Nzambi, ufuta wene mbawugubatela guhuima nu gusuanguluga. (Yeshaya 48:17, 18) Itshi idi gutumonesa egi muthu wajiya gubalumana makalegelo enji?
19 Yehowa anako gututoga ha gukalagala ndaga jiakola gubalega. (Mikhuala 30:11-14) Luholo Yehowa udi Futa dietu wa mutshima, wana gutujiya muabonga gubalega luholo esue tuana gudijiya. Wana gujiya ngolo jetu nu guleba guetu. (Ngimbo 103:14) Mupostolo Pholo watukolesa egi: “Nzambi wanamanesela gutendelela guenji, mbagatshiginago ha enue mulolewe nu gulolewa gudi mubalega ngolo jienu, uvi haza gulolewa muene mbawumihua ngolo jia gubalega muho waguzoga muene nji.” (1 Kolinto 10:13) Tuajiya gutshigina diago egi Yehowa mbawutuhana ngolo jia gukalagala ndaga jiabonga. Mbawuguhana ‘ngolo jiabalega guvula’ hagukolesela tangua dia malamba.—2 Kolinto 4:7.
ZUMBA NDAGA JIANA GUZUMBA NZAMBI
20. Makalegelo a luholo lutshi udi naye gulandula? Mukunda natshi?
20 Gila tuatshigina gubua mafuta a Yehowa, tudi naye gubemba ndaga jiagasue Yehowa wana gutuwambela egi jidi jiabola, uvi tudi naye gukalagala ndaga jiko. (Lomo 12:9) Mafuta a Nzambi ana guzumba ndaga muene wana guzumba. Jiakotelesewa mu mukanda wa Ngimbo 15:1-5. (Tanga.) Mafuta a Yehowa ana guteta khadilo dienji; ana monesa “guzumba, gusuanguluga, guhuima, guhuiminyina, gisemo, gubonga, gufubidila, gutuluga, gudikanda.”—Galatiya 5:22, 23.
21. Luholo lutshi wajiya gukhala nu makalegelo ana guzumba Nzambi?
21 Luholo lutshi wajiya gumonesa makalegelo abonga? Hagujiya ndaga Yehowa wana guzumba, udi naye gutanga Biblia nu guyilonguga tangua diagasue. (Yeshaya 30:20, 21) Gila wakalagala luholo luene, guzumba guaye gudi Yehowa mbagukola, gungima mbawujiya luholo lua gumutumagela.
22. Gila watumagela Yehowa gubonga gutshi mbawuheta?
22 Gubalumuna khadilo diaye guajiya gukhala gifua guvulula mulele ukulu ha gusudiga mulele uhe-uhe. Biblia yazuela egi udi naye ‘guvulula umuthu ukulu’ ha gusudiga ‘umuthu uhe-uhe.’ (Kolosai 3:9, 10) Ndaga yene ishigo yaleba ndo, uvi gila tuabalumuna khadilo dietu ha gutumagela Yehowa, muene watulaya egi ‘mbawugushimbiga.’ (Ngimbo 19:12) Tomba gutumagela Yehowa ha gumonesa egi Satana udi muenya mambo. Ukombelelago Yehowa mukunda nu gima ajiya guguhana masugu adi muza, uvi mukombelele handaga wana gumuzumba. Gila wakalagala luholo luene, mbawubua diago futa dia Nzambi!
a Yatshiginyilego guzuela egi muthu wagasue watshigina egi ukoke ulongugi waye wa Biblia, Satana wana gumutuma. Uvi Satana udi ‘nzambi ya ha mavu awa,’ enji “mavu agasue adi mu uhinyinyi wa muthu wabola.” Hakiene, ishigo ndaga yagudihula gula athu ako adi gugushinjiga egi ubembe gukombelela Yehowa.—2 Kolinto 4:4; 1 Yone 5:19.