MUHU 5

Itshi Ngajiya Gukalagala Tangua Adi Gungusagesa gu Khalasa?

MUKUNDA NATSHI IDI NU NDANDO

Luholo wana guhana mvutu luajiya gulondega ndaga—nga gujibolesa diago.

**ITSHI WAJIYA GUKALAGALA?**

Tangiza ndaga eyi: Masugu mbadi abalega, Thoma ashigo mutshigina guya gu khalasa. Gungima, wazula desizio dia gutuna guya. Mbeji thathu jiabalega, mafuta enji asendesele guwendesa lumene luabola mukunda nu muene. Akhalele gumuhana majina. Mona wa mu khalasa diawo wabuisa mikanda yenji, uvi wakalagala gifua gushigo mulonga; mona muko wa mu khalasa wamunana gu mulele gu ngima. Thoma wabalumuga, uvi nu gumona ndo muthu. Lusugu luabalega, mafuta enji amusonegele ndaga jiabola mu Internet, ndaga yene yamusagesele . . .

Nga wakhalele ha fundo dia Thoma, itshi wakhalele naye gukalagala?

TANGIZA THOMO HA GUKALAGALA NDAGA!

Wajiya gutangiza egi ushigo diago nu ngolo ndo! Uvi ha gumanesela mulonga wene, ushigo naye phamba gulua nu mafuta aye. Luholo lutshi?

GUHUENA TEDIE. Biblia idi muzuela egi: ‘Gihulu giana guzola khabu jiagio jiagasue, uvi muthu wa ndunge wana gukanda khabu jienji mu mutshima.’ (Ishima 29:11) Gula wahuena tedie—mu ndaga yagasue—mafuta aye adi gugusagesa ajiya gubemba gugusagesa.
GUVUTULA NDO GUBOLA. Biblia yazuela egi: “Muvutuilago muthu gubola gu gubola.” (Lomo 12:17) Gukamba guvutuila muthu gubola guana guvudisa luko ndaga.
UZODIGO NGUMA. Biblia yazuela egi: “Muthu watema, udi mulenga hadi muene mumona malamba muza.” (Ishima 22:3) Gula luholo ludi guene, lenga athu ana guzola nguma nga ndaga jiajiya guzola nguma.
GUHANA MVUTU YABONGA. Biblia idi muzuela egi: ‘Gutaya mu mbimbi ya tuluga, guana gulebesa jikhabu.’ (Ishima 15:1) Wajiya guhana mvutu yajiya gulelesa. Tufezegese: gula muthu udi gugusegulula waguwambela egi yala wakoma diago, wajiya gunyigisa phanga, gungima umuwambele egi: “Wazuela giamatshidia yala, gula watshigina ngajiya gugusumbisa ndambo ya kilo giami!”
KATUGA HA FUNDO DIENE. Nora udi nu ivo 19 wazuela egi: “Guhuena tedie guana gumonesa egi udi muthu wagukula, udi nu ngolo gubalega muthu udi gugusagesa. Guana gumonesa luko egi udi muthu wahuiminyina; uvi athu adi gugusagesa ashigo nu khadilo diene.”—2 Timote 2:24.
DIHAGELE MUTSHIMA. Matangua ako, gila muthu gashigo gudihagela mutshima, nga gajiyago guzuela, asageshi ana gukotelesa ndaga yene muphushi. Uvi, gula asageshi amona egi ushigo guahana njila ya gugusagesa, mbaagubemba.
WAMBELA MUTHU MUKO NDAGA YENE. Ndombi mumoshi wazuela egi: “Muthu wagasue udi musagesewa, awambele athu ako mulonga wene. Gukalagla luholo luene gudi ndaga yabonga, guajiya gukuatesa muthu muko ha gula asagesewago.”

Muvuala mumoshi wa yala udi mulua nu usageshi nu gikhesa giagasue — Gudihagela mutshima guajiya guguhana ngolo gubalega asageshi

WANA GUYIJIYA BA?

Gusagesewa guanago gukhala phamba gua mu muila, guajiya gukhala luko:

Mu mbimbi jiabola. “Mbangubuitshigo mutshima nga hazonda majina akhalele gungutamega, nga ndaga akhalele muzuela. Mbimbi akhalele gunguwambela jia ngutumine ha gudimona egi ngushigo nu ndando, ngudi gima gia phamba diago. Akhalele naye gungubeta gami ha fundo dia gunguwambela mbimbi jiabola.”—Celine, ivo 20.
Gubuishiwa mbalagaji. “Ana khalasa dietu asendesele gungulenga. Mu tangua dia gudia mu midi, akhalelego mutshigina egi ngudie nawo fundo dimoshi. Ngakhalele mudia hakhami, ngakhalele mudila. Ndaga yene yashiphile givo gimoshi.”—Haley, ivo 18.
Mu njila ya Internet. “Wajiya gubolesa lukuma lua muthu nu mbimbi jiazonda wasonega mu Internet. Yajiya gumonega gifua ndaga yakoma, uvi yajiya gukalegewa!”—Daniel, ivo 14.

**MIHU YATADILA GUSAGESEWA**
GIAMATSHIDIA NGA MAMBO	MVUTU (KUETEYA)
1 Mulonga watadila gusagesewa wasendesele gale mualeha ivo yavula gubalega.	1 Giamatshidia. Biblia idi muzuelela athu atamegewa egi Ingunji—jina dia athu ene diakotelesa egi “Athu ana Gubuisa Athu ako.”—Gisendeselo 6:4.
2 Gusagesewa gushigo mulonga wabola, gudi phamba ilelesa.	2 Mambo. Gusagesewa gudi mukatshi dia ndaga jiana gukalagala egi mavuala avula adijitshigile (adishiye gu luwanda).
3 Luholo luabonga lua gubinga asageshi ludi guvutula gubola mu gubola.	3 Mambo. Matangua avula, athu ana gusagesa athu ako ana khala nu ngolo jiavula gubalega muthu adi muluisa. Hene, gukamba guvutula gubola gushigo ndaga yabonga ndo.
4 Gula wamona asageshi adi musagesa muthu, kalagala gifua gushigo mulonga.	4 Mambo. Gula wakalagala ngenyi, mbawubata mulonga. Gula wamona asageshi adi musagesa muthu, uvi watuna guwambela athu ako, idi gifua udi mutshigina egi ndaga yene ikalegewe, ushigo nu funu egi ihue ndo.
5 Ikhale asageshi ako ana gudimona gifua enya ngolo, matangua ako ana guvua woma.	5 Giamatshidia. Ikhale asageshi ako ana gudimonesa gifua enya ngolo, avula mukatshi diawo ana guvua woma, ana nji gumonesa mafuta awo lamba ha gula adivue muabonga.
6 Athu ana gusagesa ako ajiya gubalumuna khadilo diawo.	6 Giamatshidia. Gila asageshi aheta ukuateshi, ajiya gubalumuna luholo luawo lua gutangiza nu makalegelo awo.