Nzambi Wafuga Dilu nu Mavu

Yehowa udi mufugi wetu. Muene wafugile ima yagasue tuana mona nu inyi tuajiyilego gumona. Gutuama egi afuge ima tuana mona, wafugile anjelo avula diago. Aye mujiya gula anjelo adi akhuatshi? Anjelo adi athu anyi Yehowa wafugile, ana khala gifua muene. Tuajiyilego guamona, gifua luholo tuanago gumona Nzambi. Muanjelo wa thomo Yehowa wafugile wabuile mukuateshi wenji. Muanjelo muene wakuatesele Yehowa ha gufuga themua, baplanete, nu ima iko yagasue. Mukatshi dia baplanete ene, tuajiya gutanga mavu, fundo diabonga tuana jinga.

Gungima Yehowa walondele mavu hagula shitu nu athu ajiya gujinga hene. Wafugile kumbi ha guhana muanya ha mavu. Wafugile milundu nu mita yakoma nu yazonda.

Gungima itshi yabuile? Yehowa wazuelele egi: ‘Ngudi mufuga muangu nu tumitshi tuazonda nu mitshi yakoma.’ Mabundu avula a luholo nu luholo nu mayiji nu iyaji, yasendesele guzoga. Gungima, Yehowa wafugile shitu jia maluholo agasue: Tunjila, shitu jiana khala mu mita, shitu jiana wenda vumo mu mavu nu shitu jiana khala nu malu. Wafugile nji shitu jiazonda-zonda gifua lape nu shitu jiakoma gifua ngiamba. Aye shitu itshi wana zumba?

Gungima Yehowa wawambelele muanjelo wa thomo egi: ‘Tufuge muthu.’ Muthu muene mbawukhala wa gudisha nu shitu. Wajiya gulonda ima. Wajiya nji guzuela, gulela nu gumukombelela. Mbawukhala mutala mavu, nu gubamba shitu. Aye mujiya muthu wa thomo Nzambi wafugile ba? Tutale longo dialandula.