Nzambi Wafuga Yala nu Mukhetu wa Thomo

Yehowa walondele gilanga gimoshi ha fundo diakhalele mutamegewa egi Edene. Gilanga giene giakhalele gia guzala nu iyaji, nu mitshi nu shitu. Gungima Nzambi wafugile muthu wa thomo nu fuluguta dia mavu; muthu muene jina dienji Adama. Nzambi wamufujile muhehe mu mazulu. Udi mujiya ndaga yakalegewe mu tangua diene? Adama wasendesele gujinga! Yehowa wamuhanele ginemo gia gutala gilanga gia Edene nu gia guhana shitu jiagasue majina.

Yehowa wahanele Adama mukhuala umoshi wa ndando yavula. Wamuwambelele egi: ‘Wajiya gudia mabundu a mitshi yagasue idi mu gilanga, uvi ushigo naye gudia mabundu a mutshi umoshi. Gula wadia bundu dia mutshi wene, mbawufua diago.’

Gungima Yehowa wazuelele egi: ‘Ngudi mulondela Adama mukuateshi.’ Wabandesele Adama tulo tuakola, wazanguile luphatshi luenji lumoshi, wafugile mukhetu mukunda nu Adama. Mukhetu muene jina dienji diakhalele Eva. Adama nu Eva akhalele fami ya thomo ha mavu. Luholo lutshi Adama wadivile tangua diamonele muene mukaji’enji? Adama wasuangulugile muavula diago, hene wazuelele egi: ‘Tala ndaga yatshita Yehowa nu luphatshi luami! Ngaheta giwa muthu wangufuana ame.’

Yehowa wawambelele Adama nu Eva ha guvuala ana nu ha guzalesa mavu. Wakhalele mutshigina egi Adama nu mukaji’enji akalagale mudimo hamoshi ha gubuisa mavu agasue phaladiso; akhale awaha gifua gilanga gia Edene. Uvi ndaga jiakalegewe ndo ngenyi. Na mukunda natshi? Mbatukotelesa muabonga ndaga yene mu longo dialandula.