Enya Isalele Alaya Yehowa Ndaga Imoshi

Tangua enya Isalele akatugile gu Ejipitu, atshitshile mbeji mbadi mu njila, gungima ahetele gu Mulundu wa Sinayi; ahagele phundo yawo guene. Yehowa wawambelele Moize ha gukanduga holu dia mulundu, wamuwambelele egi: ‘Ame ngahuluishile enya Isalele. Gula angutumagela nu abamba mikhuala yami, ene mbaabua athu ami a gijila.’ Moize wabulumigile wawambelele enya Isalele ndaga jiazuelele Yehowa. Itshi enya Isalele akalegele? Azuelele egi: ‘Mbatutshita ndaga jiagasue jiazuela Yehowa.’

Moize wavutugile luko gu mulundu. Tangua diahetele muene guene, Yehowa wazuelele egi: ‘Mbanguta naye maga masugu thathu. Temesa athu hagula akandugago gu Mulundu wa Sinayi.’ Moize wabulumugile, wawambelele enya Isalele ha gudilondega ha gutegelela Yehowa.

Gungima dia masugu thathu, enya Isalele amonele guhenya gua mvula nu tuta diabuita holu dia mulundu. Avile nji miandu nu matululu a phungi. Gungima Yehowa wabulumugile gu mulundu mu tshuya. Enya Isalele avile woma wavula, asendesele gudigita. Mulundu wagasue wazalele nu mishi, wakhalele mudigita mangololo. Matululu a phungi akhalele gudivudisa. Gungima Nzambi wazuelele egi: ‘Ame Yehowa. Mushigo naye gukombelela nzambi jiko.’

Moize wakandugile luko gu mulundu, Yehowa wamuhanele mikhuala yakhalele mumonesa gishina adi naye gumukombelela nu luholo adi naye guyitshita. Moize wasonegele mikhuala yene, gungima wayitangele enya Isalele. Enya Isalele alayele egi: ‘Mbatutshita ndaga jiagasue jiazuela Yehowa.’ Idi yadiago egi enya Isalele alayele Yehowa ha gutumagela mikhuala yenji. Uvi ataganesele diago mbimbi jiawo ba?