Phunda ya Balama Yazuela

Enya Isalele akhalele atshita gale ivo 40 mu mavu a luselenga. Akhalele atambula gale membo avula akhalele nu ibayi. Gungima ahetele gu Moaba gu khanda ya mazogelo a kumbi a Muta wa Yordane; akhalele mutshigina gungina mu mavu agutendelela. Balaka, fumu wa gu Moaba, wakhalele muvua woma egi enya Isalele ajiya gumutambula gifutshi gienji. Hene watamegele yala mumoshi jina dienji Balama ha guza gu Moaba ha guta enya Isalele mikumbu.

Uvi Yehowa wawambelele Balama egi: ‘Ushigo naye guta enya Isalele mikumbu.’ Hene Balama watunyile guya gu Moaba. Uvi fumu Balaka wamutamegele luko, wamuwambelele egi mbawumuhana ima yagasue yatshigina muene. Uvi Balama watunyile. Gungima Nzambi wawambelele Balama egi: ‘Wajiya guya, uvi udi naye guzuela phamba ndaga mbanguguwambela ha guzuela.’

Balama wanginyile holu dia phunda yenji, wayile gu khanda ya sud ya Moaba. Wakhalele mutshigina guta enya Isalele mikumbu, ikhale Yehowa wamutunyishile ha gutshita ngenyi. Muanjelo wa Yehowa wamonegele gudi muene mbala thathu hakhalele muene mu njila. Balama gakhalelego mumona muanjelo muene, uvi phunda yenji yakhalele gumumona. Mu mbala ya thomo phunda yanginyile mu muangu. Phunda yene yakuatenele gu muila seso, yabanjiginyile kulu dia Balama gu seso. Gungima phunda yaditumbigile mu mavu ha katshi na katshi dia njila. Balama wakhalele guyibeta mbala jiagasue yakhalele mu ngina mu muangu.

Mu mbala ya thathu Yehowa watshitshile egi phunda yene izuele. Phunda yahudile Balama egi: ‘Mukunda natshi udi gungubeta ngegi?’ Balama wazuelele egi: “Handaga udi gungukenesa. Gula nga ngudi nu phogo ya khusa ha mago, nga ngudi gugushiya!” Phunda yazuelele egi: “Ame ngushigo phunda wana wendela monyo waye wagasue uu nu mangino ba? Ngagukalegele gale ndaga ya luholo elu ba?”

Yehowa wakangudile meso a Balama, wamonele muanjelo. Muanjelo wamuwambelele egi: ‘Yehowa wa guwambela egi ushigo naye guta enya Isalele mikumbu.’ Balama wazuelele egi: ‘Ngatshita gubola. Ngudi muvutuga gami gu inzo.’ Uvi muanjelo wamuwambelele egi: ‘Wajiya guya gu Moaba, uvi udi naye guzuela phamba ndaga mbajiguwambela Yehowa.’

Balama wazudile longo ba? Ndo. Gungima, Balama watshitshile yagasue ha guta enya Isalele mikumbu mbala thathu, uvi mu mbala jiene jiagasue Yehowa watshitshile egi a ashimbige ha fundo dia guata mikumbu. Gungima tangua enya Isalele aluishile gifutshi gia Moaba, ashiyile Balama. Gula nga Balama wavile ndaga jiamuwambelele Yehowa nga ndaga eji jiamubuidilego.