Yehowa Wahana Samsona Ngolo

Enya Isalele avula asendesele gukombelela luko nzambi jia mambo. Hene Yehowa wabembele egi enya Filistiya a amonese lamba. Uvi guakhalele nu enya Isalele ako akhalele muzumba Yehowa. Mukatshi dia enya Isalele ene tuajiya gutanga Manowa. Muene nu mukaji’enji akhalelego nga nu mona mumoshi. Lusugu lumoshi, Yehowa watumile muanjelo gudi mukaji’a Manowa. Muanjelo wamuwambelele egi: ‘Mbawuvuala mona wa yala. Muene mbawuhuluisa enya Isalele ha mago a enya Filistiya. Mona muene mbawukhala Nazileya.’ Aye mujiya gula Nazileya wakhalele nanyi? Idi muthu wakhalele mukalegela Yehowa mudimo mu luholo lua sipesiale. Banazileya akhalelego mukoka sanga diawo.

Gungima mukaji’a Manowa wavualele mona wa yala; Manowa wamuhanele jina egi Samsona. Tangua Samsona wakudile, Yehowa wamuhanele ngolo jiavula. Lusugu lumoshi washiyile khoshi nu mago. Lusugu luko, washiyile enya Filistiya 30 muene hakhenji. Enya Filistiya akhalelego gumuzumba, akhalele mukamba luholo lua gumushiya. Lusugu lumoshi mu phipha tangua Samsona wakhalele ya gubanda gu Gaza, enya Filistiya ayile mubandemena ha mufulo wa dimbo ha gunengenena uu nu mu gimenegena ha gumushiya. Uvi Samsona wazugile mukatshi dia phipha, wayile ha mufulo wa dimbo, wakatudile gijidigo gu muila gibayi. Wagibatele ha phanga uu nu holu dia mulundu udi hehi nu Hebrone!

Gungima enya Filistiya ayile gudi Dalila munu wakhalele makangu a Samsona, amuwambelele egi: ‘Lepha Samsona ha gujiya fundo diana katuga ngolo jienji, ngenyi mbatuguhana makuta avula. Tudi mutshigina gumukuata, tumumbe mu bologo.’ Dalila wakhalele nu nzala ya makuta, hene atshiginyile. Thomo, Samsona watunyile gumuwambela fundo ngolo jienji jiakhalele mukatuga. Uvi Dalila wakhalele mulandula gumusagesa lusugu nu lusugu, hene Samsona wamuwambelele gisuegi gienji. Wazuelele egi: ‘Sendese ngavualewe khenji angukokele gale sanga ndo handaga ngudi Nazileya. Gula angukoka sanga, ngolo jiami mbajihua.’ Samsona wakalegele diago gubola guakoma luholo gawambelele mukhetu muene gisuegi gienji.

Dalila watamegele giphungu gimoshi enya Filistiya, waawambelele egi: ‘Ngajiya gisuegi gienji!’ Watshitshile egi Samsona abande holu dia malu enji, gungima watamegele muthu mumoshi ha guza gumukoka sanga. Dalila wakalulugile egi: ‘Samsona, enya Filistiya adi haha!’ Samsona waphaphumugile, uvi gakhalelego luko nu ngolo. Enya Filistiya amukuatele, amubudile meso, gungima amumbile mu bologo.

Lusugu lumoshi, enya Filistiya avula adibungishile mu tempelo ya nzambi wawo Dagona, akhalele muzuela egi: ‘nzambi wetu watuhana Samsona! Zenu n’enji haha hagula atulelese ndambo.’ Amumagenesele hakatshi na katshi dia makunji mbadi, akhalele gumulela. Samsona wakombelela Yehowa egi: ‘Oo Yehowa ngabuba, nguhane luko ngolo.’ Mu tangua diene, sanga dienji diakhalele dialehi gale luko. Walutuile makunji a tempelo nu ngolo jienji jiagasue. Tempelo yene yabuile; Samsona nu athu agasue akhalele muene afile.