Yehowa Wahuluisa Yosafata

Fumu Yosafata wagu Yuda, wamuangele giwotshielo gia Bale nu isongo mu gifutshi. Wakhalele mutshigina egi athu ajiye mikhuala ya Yehowa. Watumile mafumu nu enya Levi gu Yuda ha gulongesa athu mikhuala ya Yehowa.

Ifutshi ya hehi yakhalele muvua woma ha guluisa enya Yuda handaga akhalele mujiya egi Yehowa wakhalele guakuatesa. Abatelele nji Fumu Yosafata bakado. Uvi enya Moaba nu enya Amona nu athu akhalele gu Seyile ajile ha guluisa enya Yuda. Yosafata wajiyile egi udi naye gutoga ukuateshi wa Yehowa. Watogele athu agasue, mala nu akhetu nu ana ha gudibungisa gu Yelusalema. Watshitshile gisambu gutuama diawo egi: ‘Yehowa, gula watukuateselego, tuajiyilego gubinga. Tuabuba, tuwambele ndaga tudi naye gutshita.’

Yehowa wamuhanele mvutu gu gisambu gienji. Wamuwambelele egi: ‘Uvigo woma. mbangugukuatesa. Dilondegenu, mumagane, mutale luholo mbangumihuluisa.’ Luholo lutshi Yehowa waahuluishile?

Mu lusugu lualanduile mu gimenegena, Yosafata watombele ayimbi a ngimbo, wawambelele ha guwenda gutuama dia masuta. Akhalele muya gutuama sendese gu Yelusalema uu nu fundo diakhalele muluiwa ita; fundo diene diakalele mutamegewa egi Tekoa.

Tangua ayimbi a ngimbo akhalele mutumbuisa Yehowa nu gusuanguluga guagasue mu dijui diakola, Yehowa waluile mukunda nu athu enji. Wabuishile enya Amona nu enya Moaba tunga-tunga; asendesele gudiluisa ene hakhawo, adishiyile nga muthu mumoshi gasalelego nu monyo. Uvi Yehowa wabambele enya Yuda, nu masuta nu nganga-nzambi. Tangua athu a mu ifutshi ya hehi avile ndaga yene, akotelesele egi Yehowa yowu genji wana luila akombeledi enji. Luholo lutshi Yehowa wanahuluisa akombeledi enji? Wana guahuluisa mu maluholo avula. Muene gana khala ndo nu funu egi muthu amukuatese ha guhuluisa akombeledi enji.