Suta dia Ngolo nu Mona Mukhetu Wazonda

Guakhalele nu mona mukhetu mumoshi wazonda wa muenya Isalele gu Siliya, mona muene wakhalele gualeha nu enya fami yenji. Enya Siliya amukuatele gu ita, wabuile muenya mudimo wa mukaji’a fumu mumoshi jina dienji Namana. Mona mukhetu muene wakhalele mukombelela Yehowa, ikhale fundo diene athu akhalelego mukombelela Yehowa.

Namana wakhalele mukata misongo ya hute. Hute idi misongo yabala yana kuata athu mu gilema. Namana wakhalele mumona lamba diavula. Mona mukhetu muene wakhalele nu funu ya gumukuatesa. Wawambelele mukaji’a Namana egi: ‘Ngudi mujiya muthu mumoshi wajiya gusaga mulumi’aye. Muthu muene udi gu Isalele, udi profete wa Yehowa, jina dienji Elisha. Wajiya gusaga mulumi’aye.’

Mukaji’a Namana wawambelele mulumi’enji ndaga jiazuelele mona mukhetu muene. Namana wakhalele mutshita yagasue ha guvua muabonga; hene wayile gumbo dia Elisha gu Isalele. Namana wakhalele mutangiza egi Elisha mbawumuyamba nu ginemua giavula diago. Uvi Elisha gatelego n’enji maga, watumile muenya mudimo wenji ha gumenega Namana nu gumuwambela egi: ‘Nda ubue mbala 7 mu Muta wa Yordane. Gungima misongo yaye mbayihua.’

Namana wavile khabu jiavula. Wazuelele egi: ‘Ngatangijile egi: ‘Mbawuza mumagana gutuama diami, gungima mbawukombelela Nzambi wenji, mbawubalegesa koko guenji holu dia misongo yami ya hute ha guyisaga. Uvi muene udi gunguwambela ha guya gu muta wa gu Isalele. Tudi nu mita yabonga gu Siliya, ngajiyilego guzua meya guene ba?’ Namana wavile khabu jiavula, wakatugile gumbo Elisha.

Enya mudimo enji amukuatesele gukotelesa ndaga muabonga. Amuwambelele egi: ‘Udi naye gutshita ndaga a guwambela ha guvua muabonga. Ndaga yaguwambela profete ha gutshita idi diago yaleba. Mukunda natshi udi mutuna?’ Namana waavidile. Wayile gu Yordane, wabuile mu muta mbala 7. Habuile muene mu mbala ya 7, misongo yenji yahuile. Wasuangulugile muavula, wavutugile gudi Elisha. Namana wazuelele egi: ‘Henyaha ngajiya diago egi Yehowa udi Nzambi wa giamatshidia.’ Udi mutangiza egi mona mukhetu wa gu Isalele wadivile gikhuatshi tangua misongo ya Namana yahuile?