Tubalu Tuavula nu Phusu-phusu jia Tshuya jia Ita

Bene-Hadada fumu wa gu Siliya wakhalele muluisa enya Isalele. Uvi tangua diagasue diakhalele muene mutshigina gualuisa, profete Elisha wakhalele mutemesa fumu ya gu Isalele ha gulenga. Hene Bene-Hadada wasendesele gukamba luholo lua gukuata Elisha. Tangua amuwambelele egi Elisha udi mu dimbo dia Dotane, watumile masuta ha guya gumukuata.

Masuta a gu Siliya ayile mu dimbo dia Dotane mu phipha. Tangua muenya mudimo wa Elisha wazogele hanze mu gimenegena, wamonele masuta avula a gujieta dimbo diagasue. Wavile woma, wakalulugile egi: ‘Elisha, tukita gutshi?’ Elisha wamuwambelele egi: ‘Athu adi gu khanda yetu adi avula gubalega athu adi gu khanda yawo.’ Mu tangua diene, Yehowa wakanguile meso a muenya mudimo wa Elisha, wamonele tubalu nu phusu-phusu jia tshuya jia guzala gu milundu yagasue.

Tangua masuta a gu Siliya akambele gukuata Elisha, Elisha wakombelele egi: ‘Yehowa, ngabuba abuise ifofo.’ Masuta ene akhalele gawo mumona, uvi akhalelego mujiya luko fundo akhalele. Elisha waawambelele egi: ‘Dimbo mudi mukamba dishigo didi. Ngulandulenu ngumibate gudi muthu mudi mukamba.’ Alanduile Elisha uu nu gu Samaliya fundo diakhalele fumu wa gu Isalele.

Gungima, masuta a gu Siliya akotelesele fundo akhalele. Fumu wa gu Isalele wahudile Elisha egi: ‘Nguashiya ba?’ Udi mutangiza egi Elisha wazuelele egi ngaheta okazio wabonga wa gushiya athu atshigina gungutshita gubola? Ndo. Elisha wazuelele egi: ‘Guashiya ndo. Ahane ima ya gudia, waavutule gumbo diawo.’ Fumu wa gu Isalele watshishile wano wakoma mukunda nu ene, gungima waavutuile gumbo diawo.