Yehowa Wamonesela Yona Khadilo dia Guhuiminyina

Enya Siliya a mu dimbo dia Ninive akhalele athu abola. Yehowa wawambelele profete Yona ha guya gu Ninive ha gualongesa hagula ajiya gusombegesa makalegelo awo. Uvi Yona walengele, wayile gu khanda iko. Wanginyile mu masuwa ha guya gu Tarsise.

Tangua masuwa akhalele hakatshi dia muta, funji yakola yabundjile, afumi’a masuwa asendesele guvua woma. Asendesele gukombelela nzambi jiawo; gungima adihudile egi: ‘Mukunda natshi ndaga eyi yatubuila?’ Yona waawambelele egi: ‘Idi gubola guami. Ngatunyi gutshita ndaga jianguwambela Yehowa ha gutshita. Ngubishilenu mu kianga hagula funji ihene tedie.’ Afumi’a masuwa atunyile, uvi Yona waawambelele luko egi ngubishilenu mu kianga. Tangua amubishidile mu muta, funji yahenele tedie.

Yona watangijile egi udi mufua genji. Hakhalele mushiwuga muene mu muta, wakombelele Yehowa. Yehowa watumile ishui yakoma, yamuminyile, uvi Yona gafilego. Hakhalele Yona mu vumo dia ishui, wakombelele Nzambi egi: ‘Ngudi gugulaya egi mbangushigo luko gugushaga nga hazonda.’ Yehowa wabambele Yona nu monyo mu vumo dia ishui masugu thathu, gungima ishui yene yamulushile gonze.

Luholo Yehowa wahuluishile Yona, yakhalele mukotelesa egi gajiyilego guya luko gu Ninive ba? Ndo. Yehowa wamutumile luko ha guya guene. Mu mbala yiyi Yona wayile. Wayile gu Ninive, wawambelele athu abola egi: ‘Guasala masugu 40, Ninive mbayishiyiwa.’ Enya gu Ninive avile ndaga yaawambelele Yona, asombegesele makalegelo awo. Yakhalele diago ndaga ya gudihula. Fumu wa gu Ninive wawambelele athu enji egi: ‘Bubilenu Nzambi, balumunenu mitshima. Mbala jiko wajiya gutuhuluisa.’ Tangua Yehowa wamonele egi enya gu Ninive abalumuna mitshima, gaashiyilego.

Uvi Yona wavile khabu luholo Yehowa gashiyilego dimbo dia Ninive. Tangiza gale: Yehowa wamonesela Yona khadilo dia guhuiminyina nu dia khenda, uvi Yona gavidilego enya gu Ninive khenda. Wayile mukhala hanze ya dimbo, havule dia gamutshi gamoshi, wakhalele mujimba. Gungima, gamutshi gene gamiginyile, Yona wavile khabu jiavula. Yehowa wamuwambelele egi: ‘Udi gudisagesa muavula mukunda nu gamutshi, uvi ushigo gudisagesa mukunda nu enya gu Ninive. Ngaavila khenda, hene ngaabembi nu monyo.’ Longo ditshi Yehowa wakhalele mutshigina gulongesa Yona? Enya gu Ninive akhalele nu ndando yavula gubalega gamutshi.