Muanjelo wa Yehowa Wabamba Ezekiase

Enya gu Asiliya atambuile iphuta kumi ya Ufumu wa gu Isalele. Gungima Senakeribe fumu wa gu Asiliya, wakhalele mutshigina gutambula nji iphuta mbadi ya Ufumu wa gu Yuda. Wasendesele gutambula membo a gu Yuda. Uvi dimbo diakhalele mutshigina muene gutambula diago, diakhalele Yelusalema. Senakeribe gakhalelego mujiya egi Yehowa wakhalele mubamba Yelusalema.

Ezekiase fumu wa gu Yuda, wahanele Senakeribe makuta hagula aluishigo dimbo dia Yelusalema. Senakeribe wazanguile makuta ene, uvi watumile masuta enji ha guluisa Yelusalema. Enya gu Yelusalema akhalele muvua woma, handaga masuta a gu Asiliya akhalele musuena hehi. Uvi Ezekiase waawambelele egi: ‘Muvigo woma. Enya Asiliya adi nu ngolo, uvi Yehowa mbawutuhana ngolo jiavula guabalega.’

Senakeribe watumile muenya mudimo wenji Rabeshake gu Yelusalema ha gulela athu. Rabeshake wamaganele hanze ya dimbo, wazuelele mu dijui diakola egi: ‘Yehowa gajiyilego gumikuatesa. Ezekiase gamihuigigo. Gushigo nga nu nzambi mumoshi wajiya gumibamba ha mago etu.’

Ezekiase wahudile Yehowa ndaga adi naye gutshita. Yehowa wamuwambelele egi: ‘Uvigo woma mukunda nu ndaga jidi muzuela Rabeshake. Senakeribe mbagashigo mutambula dimbo dia Yelusalema.’ Gungima, Senakeribe watumidile Ezekiase mukanda. Mukanda wene wakhalele muzuela egi: ‘Bemba gaye, Yehowa gajiyilego gumihuluisa.’ Ezekiase wakombelele egi: ‘Yehowa, ngabuba, tuhuluise hagula athu ajiye egi phamba aye udi Nzambi wa giamatshidia.’ Yehowa wamuwambelele egi: ‘Fumu Senakeribe mbagashigo mungina gu Yelusalema. Mbangubamba dimbo diami.’

Senakeribe wakhalele mutangiza egi gualeha ndo atambule dimbo dia Yelusalema. Uvi mu phipha imoshi Yehowa watumile muanjelo gu phundo yakhalele masuta a enya Asiliya hanze ha dimbo. Muanjelo washiyile masuta 185 000! Masuta agasue a ngolo a fumu Senakeribe afile. Senakeribe gakhalelego nu ndaga iko ya gutshita, wabelele ita; hene gavutugile gumbo dienji. Yehowa wabambele Ezekiase nu dimbo dia Yelusalema gifua luholo lualayele muene. Gula nga aye nji wakhalele gu Yelusalema mu tangua diene, nga washile mutshima gudi Yehowa ba?