Yoziase Wakhalele Muzumba Mikhuala ya Nzambi

Yoziase wabuile fumu wa gu Yuda hakhalele muene nu ivo 8. Mutangua diene, athu akhalele mutshita ndaga jia wanga nu gukombelela isongo. Tangua Yoziase wataganesele ivo 16, watshitshile yagasue ha gukombelela Yehowa mu luholo luabonga. Hatagenesele muene ivo 20, wasendesele gumuanga isongo nu iwotshielo yagasue mu gifutshi. Tangua diataganesele muene ivo 26, walondele ndaga ha gulondega luko tempelo ya Yehowa.

Nganga-nzambi wakoma Hilikiya wamonele rulo imoshi mu tempelo; rulo yene yakhalele nu mikhuala ya Yehowa​—Yajiya gukhala egi Moize wasonegele rulo yene. Shafane munu wakhalele sekretere wa Yoziase, wayile nu rulo yene gutuama dia fumu, wasendesele guyitanga mu dijui diakola. Havile Yoziase ndaga jiakhalele mu rulo yene, wakotelesele egi athu alumbugile Yehowa ivo yavula. Wawambelele Hilikiya egi: ‘Yehowa watuvila khabu jiavula. Nda, ute n’enji maga. Yehowa mbawutuwambela ndaga tudi naye gutshita.’ Yehowa wahanele mvutu mu njila ya profete mumoshi wa mukhetu jina dienji Hulda, wazuelele egi: ‘Enya Yuda angutuna. Mbanguahana ndola; uvi ngushigo guyitshita tangua Yoziase udi fumu, handaga wadibulumuisa gutuama diami.’

Tangua Fumu Yoziase wavile ndaga yene, wayile mbala imoshi gu tempelo, watamegele enya gu Yuda agasue. Gungima watangele mikhuala ya Yehowa mu dijui diakola gutuama dia athu agasue. Yoziase nu enya gu Yuda adilayele ha gutumagela Yehowa nu mutshima wawo wagasue.

Enya gu Yuda akhalelego luko mutshita wano wa Pake ivo yavula. Uvi Yoziase watangele mukhuala wakhalele mumonesa egi Pake idi naye gukalegewa givo nu givo; gungima wawambelele athu egi: ‘Mbatukalagala Pake mukunda nu Yehowa.’ Gungima Yoziase walondele milambu yavula ha guhana mu lusugu luene, walondele nji athu ha guyimba ngimbo mu tempelo. Athu atshitshile wano wa Pake. Gungima atshitshile Wano wa Mapha Ashigo nu Levire; wano wene watshitshile masugu 7. Khenji guakalegewego Pake ya luholo elu sendese mu masugu a Samuele. Yoziase wakhalele diago muzumba mukhuala wa Yehowa. Aye nji wana suanguluga gulonguga ndaga jiatadila Yehowa ba?