Yesu Wabua Masiya

Yone wakhalele mulongesa egi: ‘Muthu wangubalega gukoma udi muza.’ Tangua Yesu watagenesele ivo 30, wakatugile gu Galilea wayile gu Muta wa Yordani, fundo Yone wakhalele mubatiza athu. Yesu wakhalele mutshigina egi Yone amubatize, uvi Yone wazuelele egi: ‘Ishigo ame ngudi naye gugubatiza, uvi aye udi naye gungubatijiwa.’ Uvi Yesu wawambelele Yone egi: ‘Yehowa udi mutshigina egi ungubatize.’ Hene ayile gu Muta wa Yordane, Yone wavuwile Yesu mu muta.

Tangua Yesu wazogele mu muta wakalegele gisambu. Mu tangua diene dilu diakangulugile, nyuma yajile ha muto wenji gifua yembe. Gungima Yehowa wazuelele mu dilu egi: “Aye udi Mun’ami ngana guzumba muavula; wana gungusuanguluisa.”

Tangua nyuma ya Yehowa yajidile Yesu, wabuile Klisto nga Masiya. Mu tangua diene wasendesele gutshita mudimo Yehowa wamutumile ha gutshita ha mavu.

Gungima dia gubatijiwa guenji, Yesu wayile mbala imoshi mu mavu a luselenga, wabalegesele masugu 40 guene. Tangua diavutugile muene wayile mutala Yone. Hahetele Yesu hehi, Yone wazuelele egi: “Talenu Mun’a Gimeme wa Nzambi udi mukatula gubola gua athu ha mavu.” Tangua Yone wazuelele ngenyi, wakuatesele athu ha gujiya egi Yesu wakhalele Masiya. Udi mujiya ndaga yabuidile Yesu hakhalele muene mu mavu a luselenga? Tuzuelelenu ndaga yene.