Yesu Washita Ndaga Jiavula jia Gushimana

Yesu wajile ha mavu ha gulongesa lukuma luabonga lua Ufumu wa Nzambi. Yehowa wamuhanele nyuma yenji ha gutshita ndaga jiavula jia gushimana ha gumonegesa ndaga mbajikalagala Yesu tangua mbadibua muene fumu. Wakhalele musaga athu akhalele nu ukhashi. Fundo diagasue diakhalele muya muene, athu akhalele nu misongo akhalele muza mukamba ukuateshi gudi muene; Yesu wakhalele guasaga mukut’awo agasue. Ifofo yakhalele mumona, ifua matshui yakhalele muvua, ikata yakhalele muwenda; wakhalele musaga nji athu akhalele nu bademo. Athu akhalele musagewa ikhale akuata phamba mulele wenji. Akhalele mulandula Yesu fundo diagasue diakhalele muene muya. Akhalele gumulandula nji ikhale tangua diakhalele muene mutshigina gukhala hakhenji, uvi muene gakayelego nga muthu mumoshi.

Lusugu lumoshi, athu ajile nu yala mumoshi wakhalele gikata fundo Yesu wakhalele. Uvi Inzo yakhalele ya guzala nu athu, guakhalelego nu luholo lua gungina. Hene athu atobuele yangi, abulumuishile yala muene fundo diakhalele Yesu. Gugima Yesu wawambelele yala muene egi: ‘Zuga, uwende.’ Muthu muene wazugile, wasendesele guwenda, athu adihudile diago.

Lusugu luko, Yesu wanginyile mu dimbo dimoshi, athu kumi akhalele nu hute amaganele gualeha n’enji, azuelele mu dijui diakola egi: ‘Yesu, tukuatese!’ Mu tangua diene, akhalele mutunyisa enya hute ha gusuena hehi nu athu ako. Yesu waawambelele ha guya gu tempelo ha gutshita ndaga mikhuala wa Yehowa wakhalele muzuela mukunda nu enya hute. Hakhalele ene muya mu njila misongo yawo yahuile. Muthu mumoshi mukatshi diawo wakotelesele egi misongo yenji yahua, wavutugile ha guhana Yesu mersi nu gutumbuisa Nzambi. Akhalele athu kumi uvi phamba muthu mumoshi wahanele Yesu mersi.

Mukhetu mumoshi wakhalele mukata misongo ivo 12; wakhalele mumona egi misongo yenji yajiyilego guhua. Wajile gungima dia Yesu mukatshi dia athu avula, wakuatele songi ya mulele wenji wa holu. Wakolele mbala imoshi. Uvi Yesu wahudile egi: “Nanyi wangukuata?” Mukhetu muene wasendesele guvua woma, wabalegele gutuama dia Yesu, wazuelele giamatshidia. Yesu wamuhanele gikhesa, wazuelele egi: ‘Mun’ami, nda mu guhuima.’

Fumu mumoshi jina dienji Yayilo, wabubidile Yesu egi: ‘Za gumbo diami! Mun’ami wa mukhetu udi mukata muavula.’ Uvi mona muene wafile gutuama egi Yesu ahete gumbo dia Yayilo. Tangua Yesu wahetele guene, wamonele athu avula muza ha gudila hamoshi nu enya fami ya Yayilo. Yesu waawambelele egi: ‘Bembenu gudila; mona gafuilego, uvi udi mubanda tulo.’ Gungima wakuatele mona muene mu koko, wazuelele egi: “Mona, zuga!” Mona muene wazugile mbala imoshi, Yesu wawambelele mvuaji jienji ha gumuhana ima ya gudia. Tangiza luholo mvuaji jiene jiadivile!