Yesu Washiyiwa gu Gologota

Mafumu a nganga-nzambi abatele Yesu gu inzo ya guvernere Philato. Philato waahudile egi: ‘Ndaga itshi mudi mufundila muthu yowu?’ Ene avutudile egi: ‘Udi muzuela egi udi fumu!’ Philato wahudile Yesu egi: “Aye udi Fumu wa enya Yuda ba?” Yesu wazuelele egi: “Ufumu wami ushigo wa ha mavu awa.”

Gungima Philato watumile Yesu gudi Helode fumu wa gu Galileya, ha gutala gula muene wajiya gumona gubola guakalagala Yesu. Helode gamonelego nga ndaga imoshi yabola yakalegele Yesu, wamuvutudile gudi Philato. Gungima Philato wawambelele athu egi: ‘Ame nu Helode tuamonelego ndaga yabola yatshitshi muthu yowu. Ngudi gumubemba aye.’ Athu azuelele mu dijui diakola egi: ‘Mushiye! Mushiye!’ Masuta abetele Yesu fimbo, amufitshile mate, amuwasele muavula. Amuhagele gifulu gia miya gu muto, akhalele gumulela egi: “Moyo Fumu wa enya Yuda!” Philato wawambelele luko athu egi: ‘Ngushigo mumona nga ndaga imoshi yabola yakalagala muthu yowu.’ Uvi ene azuelele mu dijui diakola egi: “Akhokhewe ha mutshi!” Hene Philato waahanele Yesu hagula amushiye.

Abatele Yesu ha fundo diana tamegewa egi Gologota, amukhokhele ha mutshi; gungima amagenesele mutshi wene. Yesu wakombelele egi: ‘Tata, atotesele handaga ashigo mujiya ndaga adi mutshita.’ Athu asendesele gulela Yesu, akhalele muzuela egi: ‘Gula udi mun’a Nzambi, tuluga gu mutshi! Dihuluise hakhaye.’

Guakhalele nu nzangi mbadi jiakhokhowe ha mutshi hehi nu muene, imoshi yawambelele Yesu egi: “Ngutangize tangua mbawuza mu Ufumu waye.” Yesu wamulayele egi: “Mbawukhala nu ame mu Phaladiso.” Gungima dia midi phipha yakola yabuile mu gifutshi gia mudidi, yatshitshile matangua thathu. Alandudi ako asalele ya gumagana hehi nu mutshi wakhokhewe Yesu, Madiya gin’a Yesu wakhalele nji n’awo. Yesu wawambelele Yone ha gubamba Madiya muabonga gifua gin’enji.

Gungima Yesu wazuelele egi: “Yatagenesewa!” Gungima wazebuile muto, wafuile. Mu tangua diene, mavu adigitshile mangololo. Rido ya tempelo yakhalele mukhaphuna Fundo dia Gijila nu Fundo Diabalega gijila yatawugile hakatshi na katshi. Fumu mumoshi wa masuta wazuelele egi: ‘Yadiago, muthu yowu wakhalele Mun’a Nzambi.’