Vizio Jiamonele Yone

Hakhalele mupostolo Yone mu bologo gu hongo dia Patemose, Yesu wamumonesele vizio 16 jia ndaga mbajikalegewa mu masugu adi muza. Vizio jiene jiakhalele mumonesa luholo jina dia Yehowa mbadibuishiwa dia gijila, guza gua Ufumu wa Nzambi nu luholo gutshigina guenji mbagukalegewa ha mavu nu mu dilu.

Mu vizio ya thomo, Yone wamonele Yehowa ha nguasa yenji ya lutumbu mu dilu; akulu 24 akhalele nu milele ilaphe nu ipho ya wolo gu mito, akhalele agumujieta. Kiajiji giakola nu matululu a miandu azogele ha nguasa yene. Akulu 24 afugamele gutuama dia Yehowa ha gumukombelela. Mu vizio iko, Yone wamonele thundu yakoma ya athu akatugile mu ifutshi yagasue, mu iphuta yagasue, mu mazuelelo agasue mukombelela Yehowa. Mun’a gimene, Yakotelesa egi Yesu, wakhalele guatuameza nu guabata gu meya a monyo. Mu vizio iko, Yesu wasendesele guhinyina mu dilu hamoshi nu akulu 24. Mu vizio yalanduile, Yone wamonele Yesu mulua nu Dragona, yakotelesa egi Satana nu bademo enji. Yesu wamubishidile ha mavu.

Gungima Yone wamonele mu vizio mun’a gimeme nu athu 144000 a gumagana holu dia Mulundu wa Siona. Wamonele nji muanjelo muzuga holu dia mavu agasue; wakhalele muwambela athu ha guvila Nzambi woma nu gumuhana lutumbu.

Mu vizio iko, Yone wamonele ita ya Alemagedona muluiwa. Mu tangua dia ita yene, Yesu nu masuta enji abingile Satana nu mavu enji abola. Mu vizio ya gisugishilo, Yone wamonele luholo guhuima guakhalele mu dilu nu ha mavu. Satana nu athu enji agasue akhalelego luko. Athu agasue mu dilu nu ha mavu akhalele munemesa jina dia Yehowa nu gukombelela phamba muene.