Aphangi a mala nu akhetu:

Aphangi:

Esue akombeledi a Yehowa, tuana zumba Mbimbi yenji, Biblia. Tuana jiya egi yana khala nu mene jia giamatshidia nu malongo abonga ana gutukuatesa mu monyo wetu. Yana khala nji nu ijiyishilo yana monesa egi Yehowa wana zumba athu. (Ngimbo 119:105; Luka 1:3; 1 Yone 4:19) Tuana khala nu nzala yakola ya gukuatesa athu ako ha gujiya giamatshidia gia ndando gidi mu Mbimbi ya Nzambi. Hene, tudi nu gusuanguluga guavula ha gumiwambela guzoga gua Mukanda, “Malongo Wajiya Guzula mu Biblia.” Maganenu tumiwambele ndambo ya ndaga jidi mu mukanda wene.

Mukanda wuwu wazolewa thomo ha gukuatesa ana azonda. Uvi wajiya nji gukuatesa mambuta adi mutshigina gulonguga ndaga jiavula jidi mu Biblia. Luholo Biblia idi mukanda wa Nzambi mukunda nu athu agasue, idi yadiago egi mukut’etu agasue Mbatuheta gubonga gula tuatanga malongo enji anyi ajiya gutukuatesa ha gukhala nu gusuanguluga gua giamatshidia.

Mukanda wuwu udi muzuelela mene jia Biblia; udi musendesa nu mene jia ndaga jiakalegewe tangua Nzambi wasendesele gufuga ima. Tuakalagala ngolo ha guzuela mene jiene mu luholo lualeba ha gukotelesa. Mene jiene jidi mu ndonga gifua luholo jiana khala mu Biblia.

Mukanda wuwu ushigo muzuelela phamba mene jia Biblia. Uvi udi nu verse nu ifuanesa idi mukuatesa ha gukotelesa muabonga mene jiene nu ha gudivua gifua udi ha fundo didi mukalegewa ndaga jiene.

Mukanda wuwu uza gutukuatesa ha gumona diago egi Biblia yana zuelela athu a maluholo agasue; ikhale athu atumagele Yehowa nga anyi amulumbugile. Uza gutukuatesa nji ha guzula malongo mu ifezegeselo yawo. (Roma 15:4; 1 Kolinto 10:6) Mukanda wene udi nu itshinyi 14. Mbimbi jia gisendeselo jia gitshinyi giagasue, jidi muzuelela mu guhihia malongo tuajiya guzula.

Gula udi mvuaji wajiya gutanga longo dimoshi nu mun’aye nu guzuelela ifuanesa. Gungima muajiya gutanga verse jia Biblia jiazudiwa mu longo diene. Kuatesa mun’aye ha gukotelesa luholo ndaga mudi mutanga mu Biblia jidi gudivua nu longo diene. Wajiya gukalegela nji metode ene tangua udi mukuatesa mbuta ha gukotelesa ndaga jidi mu Biblia.

Tudi musha mutshima egi mukanda wuwu mbawukuatesa athu agasue adi nu mitshima yatagana, ikhale ana azonda nga athu a gukula ha gulonguga Mbimbi ya Nzambi nu gukalegela malongo enji mu monyo wawo. Ngenyi, ene nji ajiya gukombelela Yehowa mu fami yenji ya guzumba.