LONGO 7

Gulongesa Ndaga jia Giamatshidia

Luka 1:3

NDAGA UDI NAYE GUKALAGALA: Kalegela mikanda idi nu ndaga jia giamatshidia hagula ukuatese athu adi gugutegelela ha gukotelesa muabonga.

Kalegela mikanda idi nu ndaga jia gaiamatshidia. Zuela ndaga jidi mu Mbimbi ya Nzambi; tanga ndaga jiene mu Biblia gila udi nu luholo lua gutanga. Gula udi muzuelela ndaga ya sianse, nga ndaga jiazuelewa mu jurnale, nga eksperianse imoshi ngenyi, nga ndaga iko ya luholo elu, diangela gutala muabonga ha gujiya gula fundo wazula ndaga jiene didi dia giamatshidia.
Kalegela mikanda muabonga. Ndanga udi mulongesa mukunda nu verse imoshi jidi naye gudivua nu verse jidi gutuama nga gungima dia verse yene. Jidi naye nji gudivua nu ndaga yana longesa Biblia nu mikanda ya “muhiga wafubidila nu watema.” (Mat. 24:45) Kalegela muabonga mikanda yanago guzuelela Biblia, uzuedigo ndaga jiagudisha nu matangi a muthu wasonegele mikanda yene.

Uvudisago ndaga mu zuelelo diaye. Gila ndaga yatadila “ndambo ya athu” uzuedi go egi yatadila “athu avula,” gila ndaga yana gubua “matangua ako” uzuedigo egi yana gubua “tangua diagasue,” gila ndaga “yajiya gukhala” uzudigo egi “idi naye gukhala.”
Kuatesa athu adi gugutegelela ha gutangiza. Gungima dia gutanga verse nga dia gumonesa fundo diasonegewe ndaga imoshi, hula mihu nu gutema guagasue nga ndo hana gifezegeselo ha gukuatesa athu akotelese muabonga.