LONGO 14

Gumonesa Matangi a Ndando Haphelo

Hebelu 8:1

NDAGA UDI NAYE GUKALAGALA: Kuatesa athu adi gugutegelela ha gulandula muabonga ndaga udi muzuela, monesa luholo gitshinyi giagasue gia ndando gidi gudivua nu muto wa lumene nu ndaga watshigina egi akotelese.

LUHOLO LUA GUYIKALAGALA:

Jiya ndaga athu adi naye gukotelesa. Tala gula ndaga udi muzuela idi naye gujiyisa athu gima gimoshi, guakuatesa ha gutshigina, nga guaahana gikhesa. Tshita ngolo ha gula matangi agasue a ndando agukuatese ha gulongesa ndaga athu adi naye gukotelesa.

Dihule egi: ‘Mihu itshi athu adi gungutegelela ajiya guhula mukunda nu ndag’eyi? Gungima dia guheta mvutu ya mihu eyi, muhu utshi ajiya luko guhula?’ Gungima, londega ndaga mu luholo luajiya gukuatesa athu adi gugutegelela ha gugulandula nu ha gugukotelesa muabonga, ha gula atshigine ndaga udi muzuela.
Vutugila muavula muto wa lumene wa ndaga udi muzuelela. Tangua udi mutshita devuare nga diskur, khala muvutugila mbimbi jia ndando jia muto wa ndaga udi muzuelela.
Monesa matangi a ndando ha phelo mu luholo lualeba. Tomba phamba matangi a ndando adi gudivua nu muto wa lumene, tala gila wajiya gualongesa muabonga mu minuta yaguhanewa. Tomba mutango wa matangi a ndando watshigina guzuelela, monesa matangi ene ha phelo. Gungima dia guzuelela matangi amoshi a ndando, huiminyina hazonda gutuama dia guzuelela matangi ako a ndando.

Wajiya gumonesa matangi a ndando mu mbimbi jiaye jia gisendeselo ha gukuatesa athu alandule muabonga. Wajiya nji guavutugila mu mbimbi jiaye jia gisugishilo ha hagula athu asale nawo mu mitshima.