LONGO 18

Gulongesa Ndaga Mbajikuatesa Diago Athu

1 Kolinto 9:19-23

NDAGA UDI NAYE GUKALAGALA: Longesa ndaga mu luholo luajiya gutuma athu adi gugutegelela ha gutangigiza. Alongese mu luholo luajiya guatuma ha gukotelesa egi ndaga waawambela idi nu ndando.

LUHOLO LUA GUYIKALAGALA:

Tangiza ndaga athu ene ana gujiya gale. Ha fundo dia guvutugila luko ndaga ana gujiya gale, akuatese ha gumona ndaga udi muzuelela gifua idi ihe-ihe.

Gula udi muzuelela ndaga jiajiyiwa gale gudi athu adi gugutegelela, jizuele mu phushi. Uvi tangua udi muzuelela matangi ahe-ahe, zuela mage-mage.
Kamba ndaga, tangigiza nji. Ha gulongesa matangi a ndando wajiya guzuelela ndaga jishigo mujiyiwa muavula gudi athu adi gugutegelela. Tangigiza muavula ha gujiya luholo gifezegeselo watshigina guhana digi gudivua nu ndaga udi mulongesa.

Tangua udi mutadila ndaga watshigina gulongesa, dihule mihu gifua: ‘Itshi? Mukunda natshi? Tangua ditshi? Fundo ditshi? Nanyi? Luholo lutshi?’ Tangua udi mukalagala devuare nga diskur diaye, khala muhula mihu ha gula tangua udi muhana mvutu gu mihu yene athu akotelese muabonga diago.
Monesa egi ndaga udi muzuela idi nu ndando. Monesa luholo malongo a Biblia ajiya gukuatesa athu adi gugutegelela mu ndaga jiawo jia lusugu nu lusugu. Zuelela ifezegeselo nu ndaga athu adi gugutegelela ajiya gutanga najio.