LONGO DIA 18
Luholo Lutshi Tuajiya Gujiya Aklisto a Giamatshidia?
Athu avula ana guditamega egi Aklisto. Uvi mukut’awo agasue ana khala ndo nu gutshigina gumoshi, ana landula nji ndo mikhuala ya luholo lumoshi. Na luholo lutshi tuajiya gujiya Aklisto a giamatshidia?
1. Muklisto udi nanyi?
Aklisto adi alandudi a Yesu Klisto. (Tanga Makalegelo 11:26.) Luholo lutshi ana monesa egi adi alandudi a Yesu? Yesu wazuelele egi: “Gula muasala agujinginyina gu mbimbi jiami, mudi diago alandudi ami.” (Yone 8:31) Yakotelesa egi Aklisto a giamatshidia adi naye gutumagela malongo a Yesu. Yesu wakhalele muzula malongo enji mu mukanda wa Nzambi, Aklisto a giamatshidia nji adi naye guzula malongo awo mu Biblia.—Tanga Luka 24:27.
2. Luholo lutshi Aklisto a giamatshidia ana monesa guzumba?
Yesu wawambelele alandudi enji egi: “Dizumbenu gifua luholo ngamizumbile.” (Yone 15:12) Luholo lutshi Yesu wamonesele egi wakhalele muzumba alandudi enji? Wakhalele mubalegesa nawo tangua hamoshi, guahana gikhesa nu guakuatesa. Wahanele nji monyo wenji mukunda nu ene. (1 Yone 3:16) Luholo lumoshi nji, Aklisto a giamatshidia ashigo naye gumonesa guzumba guawo phamba gu kano. Adi naye gumonesa mu mbimbi nu mu makalegelo awo egi ana gudizumba.
3. Mudimo utshi Aklisto a giamatshidia ana tshita?
Yesu wahanele alandudi enji mudimo. “Waatumile ha gulongesa Ufumu wa Nzambi.” (Luka 9:2) Aklisto a mu siekle ya thomo akhalelego mulongesa phamba mu mafundo awo a gukombelela, uvi akhalele nji mulongesa mu mafundo a athu avula nu gu jinzo jiawo. (Tanga Makalegelo 5:42; 17:17.) Mangino, Aklisto a giamatshidia ana longesa giamatshidia gia Biblia mafundo agasue ana sanga athu. Ana zumba athu ako, ana kalegela tangua diawo nu ngolo jiawo ha guawambela felela didi mu Biblia nu guahana gikhesa.—Mako 12:31.
UKAMBE GUJIYA NDAGA JIAVULA
Tala luholo wajiya gukhaphumuna gudisha gudi mukatshi dia Aklisto a giamatshidia nu athu anyi ana tuna gulandula malongo a Yesu nu gifezegeselo gienji.
4. Ana kamba giamatshidia gidi mu Biblia
Aklisto a mu siekle ya thomo akhalele musuanguluga nu Mbimbi ya Nzambi
Athu ako ana zuela egi adi Aklisto, uvi ana kotelesa ndo giamatshidia gidi mu Biblia. Tala VIDEO, gungima zuelelenu muhu owu walandula.
Luholo lutshi mangumba avula a Uklisto akangele athu avula njila ha gulonguga malongo a Yesu?
Yesu walongele giamatshidia gidi mu Mbimbi ya Nzambi. Tanga Yone 18:37, gungima zuelelenu muhu owu walandula:
Ha gutadila ndaga jiazuelele Yesu, luholo lutshi tuajiya gujiya Aklisto anyi ana khala gu “khanda ya giamatshidia”?
5. Ana longesa giamatshidia gia Biblia
Aklisto a mu siekle ya thomo akhalele mulongesa athu ako lukuma luabonga
Gutuama egi Yesu avutuge mu dilu, wahanele alandudi enji mudimo umoshi ha gutshita; mudimo wene wana tshitshiwa uu nu mangino. Tanga Matayo 28:19, 20 nu Makalegelo 1:8, gungima zuelelenu muhu owu walandula:
Mudimo wa gulongesa udi naye gukalegewa uu nu mu tangua ditshi nu fundo ditshi?
6. Ana kalegela ndaga ana longesa
Itshi yatshiginyishile Tom egi waheta gikombelelo gia giamatshidia? Tala VIDEO, gungima zuelelenu mihu eyi yalandula.
Mu video tuatala, itshi yatumile Tom ha gubemba guya mu ikombelelo yagasue?
Itshi yamutshiginyishile egi waheta giamatshidia?
Ndaga jiana tshita athu jiana khala nu ndando gubalega jinyi ana zuela. Tanga Matayo 7:21, gungima zuelelenu muhu owu walandula:
Ndaga itshi idi nu ndando gu meso a Yesu—gutshigina phamba egi tudi Aklisto, nga gumonesa mu makalegelo etu egi tudi Aklisto?
7. Ana gudizumba
Aklisto a mu siekle ya thomo akhalele gudizumba
Aklisto ako ahagele diago monyo wawo mu gingonza mukunda nu aphangi awo Aklisto. Tala VIDEO, gungima zuelelenu mihu eyi yalandula.
Mu video tuatala, itshi yatumile Lloyd ha guhaga monyo wenji mu gingonza mukunda nu Phangi Johansson?
Udi mutangiza egi watshitshile gifua luholo Aklisto a giamatshidia adi naye gutshita ba?
Tanga Yone 13:34, 35, gungima zuelelenu mihu eyi yalandula:
Luholo lutshi alandudi a Yesu (Aklisto a giamatshidia) ana tshita ndaga mukunda nu athu a ilema iko nga a ifutshi iko?
Itshi ana tshita mu tangua dia ita?
ATHU AKO ANA ZUELA EGI: “Aklisto atshitshile gale ndaga jiavula jia khuta—luholo lutshi ajiya gukhala mu gikombelelo gia giamatshidia?”
Verse itshi ya Biblia wajiya gutangela muthu ha gumonesa luholo tuajiya gujiya Aklisto a giamatshidia?
NDAGA WALONGUGA
Aklisto a giamatshidia ana tumagela malongo a Biblia, ana gudizumba nu ana longesa giamatshidia gia Biblia.
Mihu ya Guvutugila
Fundo ditshi Aklisto a giamatshidia ana zula malongo awo?
Aklisto a giamatshidia ana khala nu makalegelo a luholo lutshi?
Mudimo utshi Aklisto a giamatshidia ana tshita?
NDAGA JIKO JIA NDANDO
Longuga ndaga jiavula jiatadila athu anyi ana tshita yagasue ha gulandula gifezegeselo nu malongo a Yesu Klisto.
Tala ndaga yakuatesele mukhetu mumoshi wa gu katolika (religieuse) ha guheta “fami ya giamatshidia ya mu nyuma.”
Tala luholo Aklisto a giamatshidia ana monesa guzumba gudi aphangi awo Aklisto anyi ana khala nu funu ya ukuateshi.
Tala luholo Aklisto a mu siekle ya thomo nu Aklisto a giamatshidia a mangino adi mutshita ndaga ya luholo lumoshi yinyi Yesu wazuelele egi yene mbayimonesa egi adi alandudi enji.
“Tous les “chrétiens“ sont-ils chrétiens?” (Inzo Yaleha ya Mutaledi ya 1 Mars 2012 ya français)