Luholo Lutshi Fami Yaye Yajiya Gukhala nu Gusuanguluga?​—Gitshinyi gia 2

Ana adi khapho diatuhanele Yehowa. Wana toga mvuaji ha guabamba muabonga. Yehowa wana hana mvuaji malongo abonga anyi ajiya guakuatesa. Malongo ene ana monesa nji ndaga ana adi naye gutshita hagula fami yawo yajiya gukhala nu gusuanguluga.

1. Malongo atshi Yehowa wana hana mvuaji?

Yehowa wana tshigina egi mvuaji jizumbe an’awo nu abalegese nawo tangua hamoshi. Wana tshigina nji egi mvuaji jibambe an’awo gudi athu anyi ajiya guatshita gubola nu gukalegela malongo a Biblia ha guahana formasio. (Ishima 1:8) Udi muwambela atata egi: “Landulenu guasansa . . . mu mikhuala ya Yehowa.” (Tanga Efeso 6:4.) Yehowa wana suanguluga gula mvuaji jidi mulandula utuameji wenji ha gusansa an’awo, gula ashigo nji muhana ginemo giene gudi muthu muko.

2. Malongo atshi Yehowa wana hana ana?

Yehowa wana hana ana malongo egi: “Tumagelenu mvuaji jienu.” (Tanga Kolosai 3:20.) Gula ana adi munemesa mvuaji jiawo nu adi guatumagela, ana suanguluisa Yehowa nu mvuaji jiawo. (Ishima 23:22-25) Yesu wabembele gifezegeselo giabonga hakhalele muene mona wazonda. Ngatshima wakhalele muthu watagana, uvi wakhalele munemesa nu gutumagela mvuaji jienji.​—Luka 2:51, 52.

3. Luholo lutshi fami yenu yajiya gukhala nu ufuta wakola nu Nzambi?

Gula udi mvuaji, wana tshigina egi an’aye azumbe Yehowa gifua luholo aye wana gumuzumba. Itshi wajiya gutshita hagula an’aye azumbe Yehowa? Gula udi mutshita ndaga Biblia idi muzuela egi: ‘Udi naye gulongesa an’aye [mbimbi jia Yehowa] nu gujizuelela tangua mudi muta maga mu inzo yenu nu tangua mudi muwenda mu njila.’ (Mikhuala 6:7) Mbimbi ‘gulongesa’ idi mukotelesa guvutugila ndaga imoshi mbala jiavula. Yajiya gukhala egi, udi mujiya egi udi naye guwambela an’aye ndaga imoshi mbala jiavula hagula ayibuitshigo mutshima. Verse eyi idi mumonesa egi, udi naye gukamba ba okazio avula ha gulongesa an’aye ndaga jiatadila Yehowa. Idi ndaga yabonga gula athu agasue mu fami adi muzula tangua phoso nu phoso ha gulonguga Biblia hamoshi. Gula ushigo nu ana, mbawuheta gubonga gula udi muzula tangua dia gulonguga Mbimbi ya Nzambi phoso nu phoso.

TUKAMBE GUJIYA NDAGA JIAVULA

4. Longesa an’aye nu guzumba guagasue

Yajiya gukhala lamba ha gulongesa mona. Luholo lutshi Bilbia yajiya gugukuatesa? Tanga Yakoba 1:19, 20, gungima, zuelelenu mihu eyi:

• Luholo lutshi mvuaji jiajiya gumonesa guzumba tangua adi muta maga nu an’awo?

• Mukunda natshi mvuaji gashigo naye guhana mun’enji ndola tangua adi nu khabu?a

5. Bamba an’aye

Ha gubamba an’aye, idi nu ndando yavula ha guta maga nu mona wagasue mu ndaga yatadila gubungisa muila. Ndaga yene yajiya guguhana musonyi. Tala VIDEO, gungima, zuelelenu mihu eyi yalandula.

VIDEO: Bamba An’aye mu Ndaga Jiabola (2:58)

• Mukunda natshi yana khala lamba gudi mvuaji jiko ha guzuela nu an’awo ndaga yatadila gubungisa muila?

• Mu luholo lutshi mvuaji jiko jiakotelesele an’awo ndaga yatadila gubungisa muila?

Gifua luholo profesi jia Bibia jiadiangele guyizuela, ndaga jia khuta jidi mulandula gudivudisa ha mavu a Satana. Tanga 2 Timote 3:1, 13, gungima, zuelelenu muhu owu:

• Athu ako abola adi muzuelewa mu verse 13, adi mumonesa athu anyi ana zangela ana. Mukunda natshi idi nu ndando gudi mvuaji ha gulongesa an’awo ndaga yatadila gubungisa muila nu luholo ajiya gudibamba gudi athu anyi ana zangela ana?

Wana Guyijiya Ba?

Matemue a Yehowa ana zola mikanda nu video jiana kuatesa mvuaji ha gulongesa an’awo ndaga yatadila gubungisa muila nu luholo ajiya gudibamba hagula azangelewago. Ha gufezegesa, tala:

• Bamba An’aye (video)

• Écoute le grand Enseignant, mukhapho 10 nu 32

• “Parler de sexualité à son enfant” (Réveillez-vous! No. 5 2016)

6. Nemesa mvuaji jiaye

VIDEO: Luholo Lutshi Ngajiya Guta Maga nu Mvuaji Jiami? (2:19)

• Mukunda natshi idi nu ndando gudi ana nu mavuala ha guta maga nu mvuaji jiawo nu ginemua giagasue?

• Mu luholo lutshi ana nu mavuala ajiya gumonesa egi ana nemesa mvuaji jiawo tangua adi muta nawo maga?

Tanga Ishima 1:8, gungima, zuelelenu muhu owu:

• Itshi mona udi naye gutshita tangua mvuaji jienji jidi gumuwambela ndaga ya gutshita?

7. Kombelelenu Yehowa mu fami

Fami jia Matemue a Yehowa jiana zula tangua phoso nu phoso ha gukombelela hamoshi. Ndaga jitshi ajiya gulonguga mu gukombelela guene? Tala VIDEO, gungima, zuelelenu mihu eyi yalandula.

VIDEO: Gukombelela gua mu Fami​—Malamba nu Gubonga Tuana Heta (8:04)

• Ndaga itshi yajiya gukuatesa enya fami ha gutshita Gukombelela gua mu Fami phoso nu phoso?

• Ndaga itshi mvuaji jiajiya gutshita hagula gukombelela gua mu fami gusuanguluise athu agasue?​—Tala gifuanesa gia gisendeselo gia longo edi.

• Mukunda natshi yajiya gukhala lamba ha gulonguga hamoshi mu fami?

Gu Isalele ikulu, Yehowa watogele fami jiagasue ha gulonguga Mbimbi yenji lusugu nu lusugu. Tanga Mikhuala 6:6, 7, gungima zuelelenu muhu owu:

• Luholo lutshi wajiya gukalegela verse eyi?

Ndaga muajiya gukalagala mu gukombelela gua mu fami:

• Gulondega gudibungisa gua mu hungu.

• Gutanga nu guzuelela mene jia Biblia jidi musuanguluisa enya fami yaye.

• Gula mudi nu ana a zonda, muajiya gungina mu jw.org ha guzula malongo a ana nga guazola mu mashinyi (imprimer).

• Gula mudi nu mavuala, zuelelenu longo diatadila mavuala mu jw.org.

• Muajiya gukalagala nu an’enu drame dia lumene lua muthu mumoshi mu Biblia.

• Muajiya gutala video imoshi mu jw.org, gungima muayizuelela.

NDAGA WALONGUGA

Yehowa wana tshigina egi mvuaji jizumbe an’awo, jiahane formasio nu jiabambe; wana tshigina nji egi ana anemese mvuaji jiawo nu a atumagele; wana tshigina luko egi fami jimukombelele hamoshi.

Mihu ya Guvutugila

• Luholo lutshi mvuaji jiajiya guhana an’awo formasio nu guabamba?

• Luholo lutshi ana ajiya gunemesa mvuaji jiawo?

• Gubonga gutshi fami yajiya guheta gula adi mutshita gukombelela gua mu fami phoso nu phoso?

NDAGA JIKO JIA NDANDO

Malongo atshi ajiya gukuatesa mun’enu ha gukula muabonga?

“Six valeurs à transmettre aux enfants” (Réveillez-vous! No. 2 2019)

Kalegela malongo Biblia yana hana gudi athu anyi adi nu ginemo gia gusasa mvuaji jiawo jia gukola.

“Prendre soin de ses parents âgés: qu’en dit la Bible?” (Longo edi didi mu jw.org)

Tala ndaga yakuatesele yala mumoshi ha gubua mvuaji yabonga ikhale thomo gakhalelego mujiya luholo lua gusasa ana.

Yehowa Watulongesele Luholo lua Gusansa An’etu (5:58)

Tala luholo atata ajiya gukolesa ufuta nu an’awo.

“Comment un père peut-il rester proche de son fils?” (Inzo Yaleha ya Mutaledi ya 1 Novembre 2011 ya français)