Milele nu Luholo Luetu lua Gulondega Muila

Muthu wagasue mukatshi dietu wana khala nu luholo luenji lua gusudiga nu lua gulondega muila. Gula tudi mulandula malongo a Biblia, tuajiya gutomba mulele wagasue tuatshigina, uvi tudi naye nji gukamba gusuanguluisa Yehowa. Tutadilenu malongo ako mukatshi dia malongo ene.

1. Malongo atshi a Biblia ajiya gutukuatesa ha gutomba milele ya gusudiga?

Tudi naye “gusudiga mu luholo luabonga nu luatagana, [nu] gukhala nu matangi abonga,” hagula muila wetu ukhale waphelegeta, ngenyi athu ako mbaamona egi tudi ‘ya gujinginyina gudi Nzambi.’ (1 Timote 2:9, 10) Tutadile malongo awa nguana: 1) Tudi naye gusudiga mu “luholo luabonga.” Gifua luholo wana guyimona mu gudibungisa gua mu hungu, akombeledi a Yehowa ana sudiga mu maluholo a gudisha. Uvi luholo luetu lua gusudiga nu lua gulondega sanga luana monesa diago egi tuana nemesa Nzambi wetu. 2) Tudi naye gusudiga mu “luholo luatagana,” yakotelesa egi tushigo naye gusudiga mu luholo luajiya guhana athu nzala ya gubungisa muila, nga guatuma ha gututala. 3) Tudi naye “gukhala nu matangi abonga,” tushigo naye gulandula luholo lua gusudiga lua athu avula. 4) Luholo luetu lua gusudiga ludi naye gumonesa tangua diagasue egi tudi ‘ya gujinginyina gudi Nzambi,’ athu ako adi naye gujiya egi tuana kombelela Nzambi wa giamatshidia.​—1 Kolinto 10:31.

2. Mukunda natshi tudi naye gutangiza aphangi etu Aklisto tangua tudi mutomba milele ya gusudiga?

Ngatshima tuana khala nu luendu lua guditombela milele, uvi tudi naye gutangiza luholo athu ako ajiya gudivua mukunda nu milele yene. Tudi naye gutshita ngolo hagula tukhakhuisago nga muthu mumoshi, uvi ‘tukalagale ndaga jiabonga jidi musuanguluisa athu ako ha gukolesa gutshigina guawo.’​—Tanga Roma 15:1, 2.

3. Luholo lutshi sudigilo dietu diajiya gutuma athu ako ha gukombelela Yehowa?

Tudi naye gusudiga mu luholo luabonga mu ba okazio agasue, uvi muavula gubalega tangua tudi muya mu gudibungisa gua mu hungu nu mu mudimo wa gulongesa lukuma luabonga. Tushigo naye gubemba egi sudigilo dietu diwunganese athu matangi gu lukuma luabonga tudi gualongesa. Uvi, luholo luetu lua gulondega muila luajiya gutuma athu ako ha gulonguga giamatshidia nu “hagula malongo a Nzambi, Muhuluishi wetu atumbuishiwe.”​—Tito 2:10.

TUKAMBE GUJIYA NDAGA JIAVULA

4. Luholo luetu lua gulondega muila luana nemesa Yehowa

Ndaga itshi yabalega ndando yana gututuma ha gulondega muila? Tanga Ngimbo 47:2, gungima zuelelenu mihu eyi:

• Luholo tuana jiya egi tudi amoneshi a Yehowa, tudi naye gusudiga mu luholo lutshi?

• Udi mutangiza egi idi nu ndando ha gulondega muila mu luholo luabonga tangua tudi muya mu gudibungisa gua mu hungu nga mu mudimo wa gulongesa ba? Mukunda natshi wazuela ngenyi?

5. Luholo tuajiya guzula ba desizio abonga mu ndaga yatadila milele nu gulondega muila

Tala VIDEO.

VIDEO: “Tshitenu Ndaga Jiagasue Mukunda nu Gutumbuisa Nzambi” (10:18)

Ikhale milele yetu idi ya ndando nga ishigo ya ndando, uvi idi naye gukhala yaphelegeta, yatagana nu ndaga tudi mukalagala. Tanga 1 Kolinto 10:24 nu 1 Timote 2:9, 10. Gungima zuelelenu gishina tuana tuna gusudigila milele . . .

• ya mvindu nga ishigo yatagana.

• yakama, ila huanyanya, nga idi muhana athu nzala ya gubungisa muila.

Aklisto ana tumagela ndo mukhuala wa Moize, uvi mukhuala wene wana monesa luholo Yehowa wana tadila mulonga wene. Tanga Mikhuala 22:5, gungima zuelelenu muhu owu:

• Mukunda natshi tudi naye gutuna gusudiga milele yana buisa mala gifua akhetu nga akhetu gifua mala?

Tanga 1 Kolinto 10:32, 33 nu 1 Yone 2:15, 16, gungima zuelelenu mihu eyi:

• Mukunda natshi tudi naye gutshita ngolo hagula sudigilo dietu dikhakhuisago athu ako mu dimbo nga aphangi mu hungu?

• Milele ya luholo lutshi yana sudigiwa muavula ha fundo wana khala?

• Udi mutangiza egi milele iko mukatshi dia milele yene ishigo yatagana mukunda nu Aklisto ba? Mukunda natshi wazuela ngenyi?

NDAGA WALONGUGA

Gula tuazula ba desizio abonga mu ndaga yatadila gusudiga nu gulondega muila, tuana nemesa Yehowa nu athu ako.

Mihu ya Guvutugila

• Mukunda natshi sudigilo dietu nu luholo luetu lua gulondega muila ludi nu ndando gudi Yehowa?

• Malongo atshi a Biblia ajiya gutukuatesa ha guzula ba desizio abonga mu ndaga yatadila gulonda muila?

• Luholo lutshi sudigilo dietu diajiya gutuma athu ha gutuna nga ha gutshigina gikombelelo gia giamatshidia?

NDAGA JIKO JIA NDANDO

Tala luholo athu ako ajiya gugutadila tangua adi mumona milele yaye.

“Que révèle ma façon de m’habiller ?” (Longo edi didi mu jw.org)

Tangiza malamba ajiya gugubuila gutuama dia gudimba njimbu mu muila nga gudisonega mu muila.

“Tatouages : qu’en dit la Bible ?” (Longo edi didi mu jw.org)

Tutadile malongo ako a Biblia ajiya gutukuatesa ha guzula badesizio abonga.

“Ton habillement honore-​t-​il Dieu ?” (Inzo Yaleha ya Mutaledi ya Septembre 2016 ya français)

Luholo lutshi mukhetu mumoshi wakhalele mutshigina gusuanguluisa Nzambi, wasendesele gutshigina desizio dia athu ako mu ndaga yatadila gusudiga?

“Je croyais que la coquetterie était condamnable” (Réveillez-vous ! ya 22 Decembre 2003)