LONGO DIA 53
Tomba Saga Jinyi Jiana Suanguluisa Yehowa
Yehowa udi “Nzambi wa gusuanguluga.” (1 Timote 1:11) Wana tshigina egi tukhale nu gusuanguluga mu monyo wetu. Wana suanguluga gula tuazula tangua dia guhuluguga nu gutshita saga. Mu longo edi, tuza mutadila luholo tuajiya gutomba saga jiabonga jinyi jiajiya gusuanguluisa Yehowa.
1. Itshi tushigo naye gujimbila tanguatudi mutomba saga?
Saga jitshi wana tshigina gutshita ha gubalegesa tangua? Athu ako ana suanguluga gutanga mikanda, gutegelela miziki, gutala filme nga gungina mu Internet. Uvi ako, ana suanguluga gubalegesa tangua nu mafut’awo ha guzua meya, ha guta balo nga ha gutshita saga jiko. Saga jiagasue tudi mutomba ha gutshita, tudi naye gukamba gujiya gula jidi “musuanguluisa Fumu.” (Efeso 5:10) Idi diago nu ndando ha gujiya ndaga eyi, handaga saga jiavula athu ana tshita jiana sunzula ndaga jinyi Yehowa wana tuna, gifua umbundudi, uthambi nu wanga. (Tanga Ngimbo 11:5.) Itshi yajiya gutukuatesa ha gutomba saga nu gutema guagasue?
Gula tuakuata ufuta nu athu ana zumba Yehowa, mbaatukuatesa ha gutomba saga jiabonga. Gifua luholo tuayimonele mu longo dia 48, “muthu udi mukuata ufuta nu muenya ndunge mbawubua muenya ndunge.” Gu khanda iko, gula tuakuata ufuta nu athu anyi ana shiya mikhuala ya Nzambi, ‘mbatubua athu a heya.’—Ishima 13:20.
2. Mukunda natshi idi nu ndando ha gujiya guvula gua matangua tuana balegesa ha gutshita saga?
Ikhale saga tudi mutshita jishigo diago jiabola, tudi naye gutema hagula tubalegesago tangua diavula gu saga jiene. Gula ndo, tuajiyilego guheta tangua dia gutshita ndaga jiabalega ndando. Biblia yana gutuwambela egi: “Kalegelenu tangua dienu mu luholo luabonga.”—Tanga Efeso 5:15, 16.
TUKAMBE GUJIYA NDAGA JIAVULA
Tala luholo wajiya guzula ba desizio abonga mu ndaga yatadila saga.
3. Tuna saga jiabola
Mukunda natshi tudi naye gutomba saga nu gutema guagasue? Tala VIDEO, gungima zuelelenu mihu eyi yalandula.
Luholo lutshi saga jiakhalele mutshita enya Roma jidi luholo lumoshi nu saga jia mangino?
Mu video eyi, longo ditshi Danny wazudile mu ndaga yatadila saga?
Tanga Roma 12:9, gungima zuelelenu muhu owu:
Luholo lutshi verse eyi yajiya gugukuatesa ha gutomba saga jiabonga?
Ndaga itshi Yehowa wana tuna? Tanga Ishima 6:16, 17 nu Galatiya 5:19-21. Gungima dia gutanga verse yagasue, zuelelenu muhu owu:
Ndaga jitshi atanga mu verse eji tuana mona muavula mu saga athu ana tshita mangino?
Luholo wajiya gutomba saga nu gutema guagasue
Dihule egi:
Saga jitshi? Saga jiene jidi nu ndaga Yehowa wana tuna ba?
Tangua ditshi? Saga jiene jidi gungukanga njila ha gutshita ndaga jiabalega ndando ba?
Akuatshi? Saga jiene jidi gungutuma ha gukuata ufuta nu athu anago guzumba Yehowa ba?
Idi ndaga yabonga ha gulenga malamba. Hene, tudi naye gutuna saga jinyi tudi mumona egi jishigo jiabonga mukunda nu esue
4. Kalegela tangua diaye nu gutema
Tala VIDEO, gungima zuelelenu muhu owu walandula.
Phangi tuatala mu video gakhalelego mutala saga jiabola, uvi mulonga wenji udi itshi?
Tanga Filiphi 1:10, gungima zuelelenu muhu owu:
Luholo lutshi verse eyi yajiya gutukuatesa ha gujiya matangua tuajiya gubalegesa gu saga?
5. Tomba saga jiabonga
Saga jiavula jiana suanguluisa ndo Yehowa, uvi gudi nu saga jiko jiana gumusuanguluisa. Tanga Mulongeshi 8:15 nu Filiphi 4:8, gungima zuelelenu muhu owu:
Saga jitshi jiawaha jiana gugusuanguluisa?
Wajiya gutomba saga jiabonga jia gubalegesa tangua
ATHU AKO ANA ZUELA EGI: “Gula ngatala saga jiana sunzula umbundudi nu uthambi nga wanga, ishigo ndaga yabola, handaga ame ngana kalagala ndo ndaga jiene.”
Itshi wajiya gumuwambela?
NDAGA WALONGUGA
Yehowa wana tshigina egi tutombe saga jiabonga jiajiya gutusuanguluisa.
Mihu ya Guvutugila
Saga jia luholo lutshi Aklisto adi naye gutuna?
Mukunda natshi tushigo naye gubalegesa matangua avula ha gutshita saga?
Mukunda natshi udi naye gutomba saga jinyi jiana suanguluisa Yehowa?
NDAGA JIKO JIA NDANDO
Tala ha gujiya gula nanyi udi naye gututombela saga jia gubalegesa tangua.
Tala luholo wajiya guzula badesizio abonga atadila saga jia gubalegesa tangua.
“Comment se détendre sainement ?” (Inzo Yaleha ya Mutaledi ya 15 Octobre 2011 ya français)
Tala lumene “ J’ai même surmonté mes préjugés ” ha gumona gishina yala mumoshi wasombegesele luholo luenji lua gutomba saga.
“La Bible transforme des vies” (Inzo Yaleha ya Mutaledi ya 1 Fevrier 2010 ya français)
Tala luholo mama mumoshi wazudile desizio diabonga mu ndaga yatadila saga jinyi jiana monesa ndaga jiabola jia ha mavu awa.