LONGO DIA 54
“Nanyi udi Muhiga Wafubidila nu Watema?”
Yesu udi Fumu ya hungu dia Uklisto. (Efeso 5:23) Mangino Yesu udi Fumu mu dilu, uvi udi mutuameza alandudi enji ha mavu mu njila ya “muhiga wafubidila nu watema.” (Tanga Matayo 24:45.) Yesu Klisto watombele “muhiga,” wamuhanele ginemo gia guzula badesizio ako; muhiga muene udi naye gutumagela Klisto nu gukuatesa aphangi’enji Aklisto. Muhiga muene udi nanyi? Luholo lutshi muhiga muene wana gudisagesa mukunda nu esue?
1. “Nanyi udi muhiga wafubidila nu watema”?
Mu tangua dikulu, Yehowa wakhalele mutomba hunji diazonda dia athu ha gutuameza akombeledi enji. (Malaki 2:7; Hebelu 1:1) Gungima dia gufua gua Yesu, apostolo nu akulu a gu Yelusalema akhalele mutuameza. (Makalegelo 15:2) Luholo lumoshi nji nu mangino, Hunji dia Akulu Atuameji dia Matemue a Yehowa—gahunji gazonda ga akulu—diana hana ima ya gudia ya mu nyuma nu gutuameza mudimo wa gulongesa. Hunji diene didi “muhiga wafubidila nu watema wahagewe gudi fumu wenji [Yesu].” (Matayo 24:45a) Aphangi agasue a gu Hunji dia Akulu Atuameji ambiwe gale maji mu nyuma, gula afua anaya mu dilu ha guhinyina hamoshi nu Yesu.
2. Ima itshi ya mu nyuma muhiga wafubidila wana hana?
Yesu wazuelele egi muhiga wafubidila udi naye ‘guhana [alandudi a Klisto] ima ya gudia mu tangua diatagana.’ (Matayo 24:45b) Gifua luholo ima ya gudia yana gutukuatesa ha gukhala nu ngolo, nu sante yabonga, luholo lumoshi nji, ima ya gudia ya mu nyuma, yakotelesa egi malongo ana katuga mu Mbimbi ya Nzambi, ana gutuhana ngolo jiana gutukuatesa ha gukhala ya gujinginyina gudi Yehowa nu ha gutagenesa mudimo watuhanele Yesu ha gutshita. (1 Timote 4:6) Tuana heta ima ya gudia ya mu nyuma mu gudibungisa gua mu hungu, gu ba asamble a lusugu lumoshi nga a masugu thathu; nu mu njila ya mikanda yetu nu ba video anyi ana gutukuatesa ha gukotelesa gutshigina gua Nzambi nu gukolesa ufuta wetu n’enji.
TUKAMBE GUJIYA NDAGA JIAVULA
Tala mukunda natshi tuana khala nu funu ya “muhiga wafubidila nu watema,” yakotelesa egi Hunji dia Akulu Atuameji.
Aphangi a gu Hunji dia Akulu Atuameji ana hana ima ya gudia ya mu nyuma, nu utuameji nu ukuateshi gudi Matemue a Yehowa a ha mavu agasue
3. Akombeledi a Yehowa adi naye gukalagala mudimo hamoshi
Hunji dia Akulu Atuameji diana tuameza mudimo wa Matemue a Yehowa mu njila ya ukuateshi wa Yesu. Aklisto a mu siekle ya thomo akhalele nji nu ulondegi wa luholo lumoshi. Tala VIDEO.
Tanga 1 Kolinto 14:33, 40, gungima zuelelenu muhu owu:
Luholo lutshi verse eji jidi mumonesa egi Yehowa wana tshigina egi akombeledi enji akhale mu ulondegi?
4. Muhiga wafubidila wana tuameza mudimo wa gulongesa
Gulongesa lukuma luabonga guakhalele mudimo wabalega ndando Aklisto a mu siekle ya thomo akalegele. Tanga Makalegelo 8:14, 25, gungima zuelelenu mihu eyi:
Nanyi wakhalele mutuameza mudimo wa gulongesa lukuma luabonga mu siekle ya thomo?
Ndaga itshi Phetelo nu Yone atshitshile ha gumonesa egi atshiginyile utuameji wakhalele muhana apostolo?
Mudimo wabalega ndando unu Hunji dia Akulu Atuameji diana tuameza udi gulongesa lukuma luabonga. Tala VIDEO.
Yesu wamonesele egi mudimo wa gulongesa lukuma luabonga udi nu ndando. Tanga Mako 13:10, gungima zuelelenu mihu eyi yalandula:
Mukunda natshi Hunji dia Akulu Atuameji diana zula mudimo wa gulongesa nu ndando yavula?
Mukunda natshi tuana khala nu funu ya “muhiga wafubidila nu watema” ha gutuameza mudimo wa gulongesa lukuma luabonga ha mavu agasue?
5. Muhiga wafubidila wana gututuameza
Hunji dia Akulu Atuameji diana tuameza Aklisto a ha mavu agasue. Luholo lutshi ana zula badesizio mu ndaga yatadila utuameji ana hana? Tutadile luholo hunji dia akulu atuameji dia mu siekle ya thomo diakhalele mutuameza. Tanga Makalegelo 15:1, 2, gungima zuelelenu mihu eyi:
Mulonga utshi wazolele nguma mukatshi dia Aklisto a mu siekle ya thomo?
Gudi nanyi Phaula nu Barnabase nu athu ako ayile ha gumanesela mulonga wene?
Tanga Makalegelo 15:12-18, 23-29, gungima zuelelenu muhu owu:
Gutuama dia guzula desizio, itshi hunji dia akulu atuameji dia mu siekle ya thomo akhalele mutshita tangua akhalele mukamba utuameji wa Nzambi mukunda nu mulonga umoshi ngenyi?—Tala verse 12, 15, nu 28.
Tanga Makalegelo 15:30, 31 nu 16:4, 5, gungima zuelelenu mihu eyi:
Ndaga itshi Aklisto a mu siekle ya thomo atshitshile tangua ahetele utuameji waahanele hunji dia akulu atuameji?
Luholo lutshi Yehowa waashimbigile luholo akhalele guatumagela?
Tanga 2 Timote 3:16 nu Yakoba 1:5, gungima zuelelenu muhu owu:
Mangino fundo ditshi Hunji dia Akulu Atuameji diana kamba utuameji gutuama dia guzula badesizio?
ATHU AKO ANA ZUELA EGI: “Gula udi mulandula ndaga jiana zuela Hunji dia Akulu Atuameji, idi gifua udi mulandula athu.”
Itshi idi gugutshiginyisa diago egi Yesu wana tuameza Hunji dia Akulu Atuameji?
NDAGA WALONGUGA
Hunji dia Akulu Atuameji didi “muhiga wafubidila nu watema” munu Klisto watombele. Ana tuameza nu ana hana ima ya gudia ya mu nyuma gudi Aklisto a ha mavu agasue.
Mihu ya Guvutugila
Nayi watombele “muhiga wafubidila nu watema”?
Luholo lutshi Hunji dia Akulu Atuameji diana gudisagesa mukunda nu esue?
Wana tshigina diago egi Hunji dia Akulu Atuameji diene didi “muhiga wafubidila nu watema” ba?
NDAGA JIKO JIA NDANDO
Tala luholo Hunji dia Akulu Atuameji ana gudilonda ha gutuameza mudimo wawo.
“Qu’est-ce que le Collège central des Témoins de Jéhovah ?” (Longo edi didi mu jw.org)
Tala ndaga jiana tshita Hunji dia Akulu Atuameji ha gutuhana ima ya gudia ya mu nyuma.
Luholo lutshi aphangi a gu Hunji dia Akulu Atuameji ana gudivua mukunda nu mudimo waahanele Yesu ha gukalagala?
Luholo lutshi gudibungisa gua mu hungu nu ba asamble etu ana monesa egi Yehowa wana tuameza Hunji dia Akulu Atuameji?